Liverpool chhuahsan tur Lallana

Premier League hmahruaitu Liverpool chuan nipui transfer-a a contract hmang zo tur Adam Lallana chelh tumna an nei lo a, English midfielder hi Leicester City nen sawi zawm mek a ni. 

Lallana hian kum 2014 khan Southampton aṭangin beiseina sang tak nen Reds hi a zawm a, hetihlaia a man zat hi pound maktaduai 25 niin Anfield-a amah laluttu hi tuna Foxes coach Brendan Rodgers a ni. 

Kum 31 mi Lallana hian tun season-ah Liverpool tan league match 13 a khel a, goal khat a khungsak - a goal khung chhun erawh Manchester United nena an inhnehtawkna goal a ni a, tun thlengin league-ah Reds an tlawm loh phah. 

Tun hnai season hnih chhungin Lallana hi hliam vangin a talbuai a, Jurgen Klopp-a'n Liverpool a enkawl tirhin player pawimawh ni mah se hliam vangin tun hnaiah a beisei angin hmun a chang meuh tawh lo. 

England tan vawi 34 inlana goal thum khung thei Lallana hian Reds tan inelna hrang hrangah match 175 khelin goal 22 a khungsak a, Anfield-ah a hlawhtling tih ngam a ni. 

Reds tan Champions League, UEFA Super Cup leh FIFA Club World Cup nomawi a chawi a, Premier League nomawi a chawi ngei a beiseiawm bawk.