Smalling-a'n Euro khelh a inbeisei

AS Roma defender Chris Smalling chuan Euro 2020-ah England tan a khelh theih a beisei thu a sawi. English defender hi kum 2017 hnu khan Three Lions tana inlan tura koh a ni leh tawh lo. 

Kum 30 mi defender hian season ṭan dawn khan Manchester United aṭangin Roma hi loan hmangin a zawm a, Italian club-ah hian player ṭha zawka a inchher thu a sawi. 

Smalling chuan, "England tana ka inlan lohna hi a rei leh tawh tih chu ka hria a, mahse kan ram jersey hak châkna hi a la reh thei lo. Gareth Southgate leh a coaching staff-te pawhin ka inkhel an rawn en ṭhin tih ka hria a, top club tana khelh chuan min ngaihtuah lo thei lo. 

"He hmunah hian theihtawp chhuah zel ka tum a, thil lo thleng apiang chu lawm takin ka pawm ang. Mahse, chiang taka ka sawi duh chu Euro khelh hi ka châk em em a ni," a ti a, awlsam taka England squad-a kir leh theih erawh a ni lo ang. 

Tlarhnung laia ding turin Manchester United captain Harry Maguire, Liverpool tana khel ṭha chho tak Joe Gomez, Aston Villa defender Tyrone Mings, Manchester City centre back John Stones, Everton defender manto Michael Keane leh Chelsea defender ṭhangduang Fikayo Tomori te chu England-in an neih a ni. 

Mahse, Stones leh Tomori  hi club tan an regular phak lo a, hei hian Smalling beiseina a siamsak ang. Season tawp ruala a loan hun hmang zo tur defender hian Roma-a cham chhunzawm pawi a tih loh thu a sawi bawk.