Zanin aṭangin Mizoram Super League Tuikual South hmachhawn tur Chawnpui
Tualchhung basketball inelna lian leh ngaihhlut ber Mizoram Super League season 6 chu zanin aṭangin khelh ṭan a ni dawn. Hawla Indoor Stadium, Republic Vengthlangah Tip Off neih a ni dawn a, dar 7:30-ah Tuikual South leh Chawnpui Basketball Club ten match hmasa ber an khel ang.
Tata Altro MSL-ah hian team paruk - Zarkawt BCA, Khatla TBL, Tuikual South, Chanmari Vikings, Chawnpui leh Ramhlun te an awm, vawi khat inkhelh kual hnuah a sang paliin semifinal an khel dawn; match hmasa ber aṭangin a pawimawh nghal vek tihna a ni.
Mizo hlang
Team tinin India ram pawn player pakhat bakah state pawn player pahnih an nei thei a, tun ṭumah hian an player lakluh tur an lo la thlen loh avangin Tuikual leh Chawnpui te hian Mizo hlangin inelna bul an ṭan dawn.
Chawnpui manager Laltlawmlova chuan, "Team dang angin kan hausa tawk lo a, kan player pawh tualchhung mi an ni hlawm. Inelnaah hian Mizo leh Mizo kan inkhel a nih chuan tumah kan huphurh bik lo," tiin an inrintawk thu a sawi.
TSBC lam pawh an zam bik lo, coach C. Lalrohlua chuan, "Foreigner awm lo mah se Mizo hlanga khelh hi kan chak," tiin Vanglaini a hrilh ve bawk. Team pahnih hian inbuatsaihna an nei ṭha a, inkhel hmuhnawm a beisei ngam ang.
Inringtawk
Chawnpui hian an squad-ah player 15 an ziak lut a, chung zinga 11 zet chu an veng tlangval an ni - an khelho rei tawh tih a chiang. An chak tawk lohna lai thuam chak turin Zotlang guard Andre Lalhruaitluanga, Lalramsanga Sailo (Vaivakawn) leh T. Lalremtluanga te an nei bawk a ni.
Season hmasa Division 1 champion enkawltu Tlawmlova chuan, "Ka naute hnenah hian 'Team ṭha ber kan nih loh pawhin inbuatsaih ṭha ber ni ang u' tih chu kan infuihna a ni," a ti. Chawnpui tlangval hian a naute chu an khel hona a rei tawh avanga an inman thu a sawi tel bawk.
Tuikual chungchang sawi zuiin, "Season hmasa finalist an nih avangin Tuikual hi an ṭha tih chu a chiang reng, mahse inelna sang ber khel tura kan tlin theih avangin eng team pawh ni se kan huphurh bik lo," tiin Vanglaini a hrilh.
Phengphehlep an inpeih
India captain Amritpal Singh chu knockout stage chinah chauh an chhawr thei dawn, league round aṭanga hman theih an beisei United States player Darrel Steven Bowie pawh visa buaina vangin a hunah a lo thleng thei rih lo.
TSBC coach Marova chuan, "Tumah kan huphurh bik lo, inelna hmachhawn turin kan inpeih tawh. Player an dam kim a, an fit ṭha em em bawkin ka hria, kei chuan ka naute chungah rinna ka nghat.
"Season hmasa khan Kolasibah MBBA Promotional Tour neih a ni a, squad kim lo chungin Chawnpui hi kan hneh lo, tunah chuan a boruak a danglam tawh ang. Hneh let tumin theihtawp kan chhuah dawn a ni," tiin Vanglaini a hrilh.
Chawnpui Basketball Club
# Players Jersey No Position Khua/Veng
1 Laltlanhlua 7 Center Chawnpui
2 K. Lalremsanga 11 Shooting Guard Chawnpui
3 K. Lalrinenga 12 Small Forward Chawnpui
4 Lallianmawia 3 Shooting Guard Chawnpui
5 Zoliantluanga 8 Small Forward Chawnpui
6 Zohmingliana 33 Forward Chawnpui
7 Vanlalthlamuana 10 Center Chawnpui
8 R. Lalmuanpuia 1 Shooting Guard Chawnpui
9 Andre Lalhruaitluanga 20 Guard Zotlanga
10 Harry Koop Singh 21 Forward United States
11 R.V.L. Hriatrenga 39 Point Guard Chawnpui
12 T. Lalremtluanga 23 Small Forward Hunthar
13 Jackson Lalrintluanga (Captain) 13 Center/Forward Chawnpui
14 Lalramsanga Sailo 14 Power Forward Vaivakawn
15 Zodina Chawngthu (Vice Captain) 9 Shooting Guard Chawnpui
Manager Laltlawmlova Chawnpui
Coach Samuel Zodinpuia Chawnpui
Asst.Coach K. Lalremsanga Chawnpui
Physio Lalramngaihawmi Chaltlang