Arteta enkawl Arsenal an danglam

Mikel Arteta-a'n beiseina nen Arsenal a din thar leh mek a, striker Pierre-Emerick Aubameyang-a goal hnih hmangin Gunners hian Everton chu 3-2 a hnehin hmalam an pan ve zel.

Season hmasa Premier League goal khung hnem ber Aubamayeng-a'n season kal laiah goal 17 nei tawhin a chung berah a awm leh tawh. North London club captain hi Barcelona lamin ngaihven mah se coach Arteta chuan an hnena a cham zel a beisei thu a sawi.

Spanish manager Arteta chuan, "Barca chuan an duh ang, a chhan chu player ṭha tak a nih vang a ni. Kan hnena cham zel tur hian kan hmin ngei tur a ni a, player pawimawh leh ṭangkai a nih vangin a cham pawh ka beisei," a ti.

Pathianni zan Emirates Stadium-a inkhelah Dominic Calvert-Lewin chuan ṭan aṭanga second 49-na lekah goal hmahruai a khung a, chawlhlawk hnu second 29-na lekah Auba chuan an goal thumna leh chakna goal ni bawk a khung ve thung.

Gylfi Sigurdsson-a freekick petah Arsenal tlarhnung talbuai vangin Calvert-Lewin-a'n a khung chu striker Eddie Nketiah chuan Bukayo Saka siamsak hmangin a sut; Aubameyang hmanga hma an hruai let hnuah Toffees lamin Richarlison hmangin an sut.

Second half-ah Carlo Ancelotti naute an inring hman lo, winger Nicolas Pepe cross chu Auba-a'n chiang zeta tauh lutin an goal an venghim tluan bawk; kum 2020 bikah Gunners hian chak loh an la nei lo.

Nikum December thla khan team pahnih hi Goodison Park-ah an intawng a, manager lailawk Freddie Ljungberg leh Duncan Ferguson ten kaihruaiiin, kha tih laia coach thar Arteta leh Ancelotti te chuan mual sir aṭangin inkhel an en - tunah chuan coach pahnih inbeihna a ni tawh.

Athens lama Europa League khel chau player panga chuan inkhel bul an ṭan nawn, mikhual Toffees erawh February 8 hnua an match hmasa leh ber a ni thung. Arsenal hian inkhel an thunun a, phurna leh beiseina nen an khelh avangin hnehna an chang.

Arteta chuan, "Athens aṭangin kan haw chauh a, inkhel tir lamah hma takin goal kan chhuah bawk. Chumi hnuah huaisen taka kan thawh leh theih avangin ka lawm takzet, ni sarih chhunga match thum khelh chu a hautak a ni," a ti.