Aizawl FC-in point an hlawh chhuak

Pathianni zan I League inkhelah Aizawl FC leh Chennai City 1-1 in an inhnehtawk. Jawaharlal Nehru Stadium, Coimbatore-a inkhelah hian Chennai City-in Katsumi Yusa hmangin goal an khung hmasa a, Mizo club-in Rochharzela penalty hmangin an sut.

I League inkhel dangah Inrinni zan khan Mohun Bagan-in Churchill Brothers 3-0 in an hneh a, Kolkata club-in nomawi an hnaih ta hle. East Bengal pawhin Pathianni zan khan Trau 4-2 in an hneh a, palinaah an invawrh chho bawk.

Aizawl FC-in an RG Stadium-a Trau an hneh hnuah khualmualah match nga  khelh tur an nei a, Churchill Brothers hneh loin bul an ṭan. Chennai City nen Standly Rozario-a'n tlarhnungah Joseph Adjei leh Richard Kassaga te a inkawptir thei a, foreigner pathum dang captain Alfred Kemah Jaryan, Matias Veron leh Justice Morgan te pawhin inkhel bul an ṭan.

I League champion lai Chennai City-in foreigner pali chhawrin Mohun Bagan kawr mawipui tawhtu Katsumi Yusa a langsar hle. Chennai City-in goal chance an nei hmasa a, Vijay-a goal khung tur chu AFC keeper Zothanmawia'n ṭha zetin a dansak. Chennai coach Akbar Nawas-a'n huaisen takin first half-ah player a thlak a, Rohit Sharma aiah Syed Suhail Pasha chu minute 38-naah an luhtir. Minute thum hnuah Pasha cross chu Japanese midfielder Katsumi-a'n a tauh lut.

Aizawl FC-in siphurh sut tumin an nawr let a, injury time-ah Matias Veron ball pet ṭha chu keeper Nauzet Garcia Santana-a'n a dang. Mizo club hian second half ṭantirhah an siphurh an sut a, Justice Morgan-a'n Roberto Eslava laka a penalty hlawhchhuah chu Rochharzela'n minute 54-naah a khung.

Captain Alfred Kemah Jaryan-a'n Mizo club lawmna a siam teuh a, amaherawhchu keeper Nauzet Garcia Santana-a'n Chennai City a chhan. Hun tawp hnaiah Basel aṭanga loan hmanga Chennai club zawmtu Jan Muzangu siam chu Katsumi-a'n a khung a, chakna goal ni turah ngaih hman ni mah se Japanese midfielder handball vangin pawm a ni lo. Mizo club-in Coimbatore-ah point hlu tak an hlawh chhuak.

Mohun Bagan an che ṭha chhunzawm a, Goa-ah Baba Diawara, VP Suhair leh Komron Tursunov te goal hmangin mualneitu Churchill Brothers 3-0 in an sawp. Mariners hian match 32 aṭangin point 32 an hmu a, anmahni hnaih bertu Punjab FC aiin point 11 in an hmu sang zawk.

I League team dang 10 erawh an intluk tawk a, vawi khat chakin table-a ti danglam nasa thei hle. Pathianni zanah East Bengal-in Trau 4-2 in an hneh a, goal khungtu zingah Mizo tlangval Brandon VL Remdika a tel. Kolkata club hian hnehna an chan avangin table hnuai lam aṭangin palinaah an invawrh.

Mizo club Aizawl FC erawhin 10-na dinhmmun an luah leh rih a, chutihrualin pariatna Neroca nen point 15 ve ve an hmu. Standly Rosario hote hian March 29, Inrinni hian Real Kashmir an tlawh dawn a, relegation zone aṭanga tal chhuak turin point hlawhchhuah a pawimawh ang.

Neroca    3 - 2    Gokulam Kerala

NER : Pritam Singh 2'; Tettey Narh Phillip Adjah 48'; 

   Ronald Singh 81'

GOK : Shibil Muhammed 25'; Nathaniel Garcia 40'

Churchill Brothers    0 - 3    Mohun Bagan

MB : Baba Diawara 7'; VP Suhair 50'; Komron Tursunov 58'

Trau    2 - 4    East Bengal

TRA : Olariche Princewell Emeka 18'; Oguchi Uche 85' (P)

EB : Jaime Santos 52'; Kassim Aidara 67'; Brandon VL Remdika 69'; Marcos Martin 76' (P)

Chennai City    1 - 1    Aizawl FC

CCFC : Katsumi Yusa 41'

AFC : Rochharzela 54' (P)