Man City mikhual tur Hammers

Manchester City-in zanin dar 6:00 hian Etihad Stadium-ah West Ham an mikhual dawn. Pep Guardiola hote hi inelna hrang hrangah match 19 chhung an chak zawn tawh a, Hammers lakah an record duhawm tak hi an chhunzawm theih a rinawm.

Man City-in inhliam langsar an neih chhun chu Nathan Ake chauh a ni tawh a, Dutch defender hi dam ṭha reng pawh ni se khelhna hmun a chan kher a rinawm loh. Forward chhuanvawr Sergio Aguero pawh Borussia Monchengladbach nen an inkhelh ṭumin bench aṭangin a lut a, kumin January 3 hnua a vawi khat nan Argentine forward a rawn inlan.

Man City-in Thawhlehni zanah Wolves an hmachhawn lehnghal dawn avangin Spanish manager Pep-a'n awmze nei takin squad a siksawi a rinawm. Tun season-ah City tan Ilkay Gundogan, Raheem Sterling leh Phil Foden te tlarhmaah an langsar a, tlarhnung lamah Portuguese player pahnih Rúben Dias leh Joao Cancelo te an che ṭha. Kum 26 mi Cancelo hi goal nawr kawngah pawh a ṭangkai a, City player hmuhnawm ber zinga mi a ni.

Season chawhnu lamah player pawimawh Kevin De Bruyne leh Aguero te an dam chho leh ta bawk a, Guardiola-a'n goal nawr thiam Man City chu goal ven thiamah a chhuah bawk nen champion tura rinkai lawrlak an ni. Amaherawhchu West Ham hian London Stadium-ah October thla khan Man City hi 1-1 in an chelh a, David Moyes-a hote hian Etihad Stadium-ah thilmak thlentir an tum ang.