Shoretire-a'n record a siam

Europa League last 32 second leg-ah Manchester United-in Ningani zan khan Real Sociedad an mikhual a, goal awm loin an inhnehtawk. Ole Gunnar Solskjaer-a hoten first leg-ah 4-0 a hnehna an chan avangin last 16 erawh harsatna nei loin an lut.

Old Trafford-ah Europe inelnaah hian Man United tan Shola Shoretire-a'n minute 76-naah Marcus Rashford a thlak. Kum 17 leh ni 23 mi Shoretire hian United tan Europe inelnaa inlan thei naupang ber record a siam a, Norman Whiteside record chu ni 108 in a khum.

Newcastle-a piang Shoretire hian February 8 khan contract a ziak a, February 18-ah a vawi khat nan senior matchday squad-ah an dah a, February 21-a Newcastle nen an inkhelh ṭumin a vawi khat nan senior team-ah a inlan. February 2 khan Shoretire hian kum 17 a tling chauh a, hmabak a nei êng hle.

Sociedad lakah hian rawlthar duhawm Amad Diallo pawh a inlan a, first leg-a an chak chian avangin Solskjaer-a'n player enchhin nan a hmangah a ngaih theih. Old Trafford-a inkhelah Sociedad captain Mikel Oyarzabal-a'n penalty a pet over a, United defender Axel Tuanzebe goal khung chu VAR rawn a nih hnuah Victor Lindelof-a'n foul a neih avangin pawm a ni lo.

United manager Ole Gunnar Solskjaer chuan, "Shoretire hi player naupang, rilru dik leh infiammi tak a ni a, thutlukna ṭha tak tak a siam ṭhin. Muang changin first team-ah kan telh chho ang a, hmabak êng tak a neiin ka hria," tiin a fak.