Pathianni zanah Chelsea Vs Man Utd

Thomas Tuchel-a kaihhruai Chelsea-in Pathianni zan dar 10:00 hian Stamford Bridge-ah Manchester United an mikhual dawn. Ole Gunnar Solskjaer hote hi Old Trafford-ah Frank Lampard-a kaihhruai Blues nen goal awm loin nikum khan an inhnehtawk a, Man United hmaah Tuchel fiahin a awm ang.

Chelsea-in club legend Frank Lampard an ban khan fans ṭhahnem takin a hma mah mah tiin Roman Abrahimovic leh a hote thutlukna an sawisel. Amaherawhchu Tuchel-a'n result ṭha a keng tel a, Lampard hming a reh hmak.

Blues-in German manager hnuaiah hneh loh an la tawng lo a, league match vawi rukah vawi li an chak. Chelsea hneh zingah hian Tottenham Hotspur an tel a, fiahna hautak bera ngaih Atletico Madrid lakah pawh 'distinction' nen an paltang tihih a sawi theih.

Result ringawt hi Tuchel-a hnuaia hmasawnna a ni lo a, German manager awm hnuah player rintlak a ngah. Frank Lampard-a'n Spanish manager Kepa Arrizabalaga chu rin tlak loah a chhuah a, Edouard Mendy chiah goalkeeper chhawrtlak a nei.

Tuchel-a hnuaiah erawh Mendy leh Kepa te an inel a, tu pawh lut se Blues ṭantute tan hlauhthawn tur awm lo ang. Chutihrualin Tuchel hian team ṭhatna tur a nih chuan thutlukna harsa siam a hreh lo.

Southampton nen an inhnehawk ṭumin second half-a lut Callum Hudson-Odoi chu darkar chanve pawh tling loah Hakim Ziyech hmangin a thlak lenghal. Amaherawhchu Tuchel hian English winger Hudson-Odoi hi Atletico nen bul a ṭantir lehnghal a, team chhungah boruak ṭha lo a awm phah lo.

Chelsea hian Tuchel hnuaiah hmasawnna an nei a, Jose Mourinho leh Diego Simeone hote lakah fiahna an paltlang tawh. Tun ṭuma an hmachhawn tur Solskajer-a hote pawh hi Blues fiahna tur a ni a, season thara Champions League khelh an duh a nih chuan chak a pawimawh dawn a ni.

Ole Gunnar Solskjaer-a hnuaiah Man United pawhin hma an sawn a, champion tur khawpa an ṭha tawk lo a nih pawhin Sir Alex Ferguson hnua an ṭhat leh ber ṭumah a ngaih theih.

Norwegian manager hian a chhawr loh tur player hlawh tam a chhuahtir a, academy player-te rin ngam avangin Jose Mourinho hun lai aiin an squad a chhah tawh zawk.

Man United hian hliam vangin Paul Pogba an chhawr thei dawn lo a, Edinson Cavani pawh hliam vang thoin a dinhmun a chiang lo. Europa League squad-a awm lo Donny van de Beek leh Scott McTominay te erawh Chelsea hmachhawn thei turin an dam hman a rinawm.

Mourinho hun laiin Pogba inhliam a langsar ṭhin a, tunah erawh French midfielder awm lo hi Bruno Fernandes-a'n a hliah khuh hneh em avangin sawi a hlawh tawh lo. Solskjaer-a'n Newcastle United an hneh zawhah table chung bera awm Manchester City nen an inkar tihzim an tum tur thu a sawi a, a thusawi tihlawhtling tur chuan Chelsea an hneh a ṭul ang.