Ni 2 chhung lekin India-in England an hneh
Test cricket hi ni nga chhung khelh theih a ni a, Ahmedabad-a India leh England inkhelh ṭumah erawh Virat Kohli hoten hnehna chang turin ni hnih bak an an mamawh lo. Men in Blue hian wicket 10-in Three Lions an hneh a, match khat khelh hmabakah 2-1 in hma an hruai mek.
Third test-ah spinner an langsar a, Gujarat tlangval Axar Patel chu India chakpuitu a ni. Kum 27 mi Patel hian first innings-ah wicket ruk (38/6) a la a, second innings-ah wicket nga (32/5) a la leh bawk.
Spinner an che ṭha
England hian bat hmasak an thlang a, run 112-ah an thi vek. Opener Zak Crawley-a'n run 53 a siam a, player dang 10 zingah run 20 siam tling an awm lo.
India tan fast bowler Ishant Sharma-a'n wicket khat a la ve tih loh chu spinner pahnih Axar Patel (38/6) leh Ravichandran Ashwin (26/3) ten an la. Men in Blue dinhmun a ṭha a,
amaherawhchu first innings-ah an bat ṭha bik lo.
India hian run 145 chauh an siam a, Jack Leach-a'n wicket li (54/4) a la. Captain Joe Root-a'n mak takin run riat lek pein wicket nga a la bawk. England tan pawh spinner an che ṭha a, beiseina thar an neih phah.
Amaherawhchu second innings-ah pawh England batsman-ten Patel leh Ashwin te an ngam chuang lo a, run 81 an siam tihin an thi vek. India tan chak turin run 49 chauh siam a ngai a, Rohit Sharma (25*) leh Shubman Gill (15*) ten thi loin an tum ram an thleng. Rohit Sharma-a'n hnehna an chan nan Joe Root-a vawm chu six a vuaksak.
Eng nge an sawi?
England captain Joe Root chuan, "Kan khelh ṭha lo a, kan theihna angin kan khel lo a ni. Pitch kha khelh a harsa a, first innings-a run 200 tal kan vaw tling thei lo kha a pawi a ni," tiin an khel ṭha lo tih a pawm.
India captain Virat Kohli chuan, "Hnehna kan chang a, chutihrualin team pahnih batting a ṭha lo dun hle," tiin hnehna chang mah se an khelh ṭhat bik loh thu a sawi.
India hian 140.2 overs (842 balls) zawhah hnehna an chang a, record ropui tak a nih rualin Test match a tan result ṭha a ni lo tih chu an sawi zui dan a ni a, pitch-in sawisel a hlawh bawk. Men in Blue telna inkhelah kum 1935 hnua Test match khelh chhung rei lo ber a ni. March 4-5, 2021 hian India leh England ten Ahmedabad-ah fourth Test an khel ang.