Pathianniah Aizawl FC dinhmun hriat dawn

I League phase 1 chu March 1, Thawhṭanniah khelh zawh a ni dawn a, Aizawl FC hmalam hun chu February 28, Pathianniah a hriat vek dawn.  Pathianni tlai dar 2:00-ah Mohammedan SC leh Real Kashmir te an inkhel dawn a, tlai dar 4:05-ah Sudeva Delhi leh Trau te an inkhel chhunzawm ang.

Mizo club hian Pathianni zan dar 7:00-ah Chennai City an hmachhawn dawn a, inkhel hmasa pahnih result hian Yan Law-a hote hmalam hun thui tak a nghawng dawn. 

Mohammedan SC hian an match hnuhnung berah Chennai City 2-1 in an hneh hram a, table-ah paruknaah awmin Aizawl FC pasarihnaah an tla thla thung. 

Kolkata club hi an khelh tawh dan thlirin champion tur khawpin an ṭha tawk lo a, amaherawhchu Mizo club ti tla thei dinhmunah an ding. Mohammedan hian Real Kashmir an hneh a nih chuan champion tur zawng tur team parukah an tel ang a, Mizo club-in an umpha thei tawh lo ang.

Chutihrualin Real Kashmir hian hneh loh an la tawng lo a, David Robertson-a hote hian champion an duh a nih chuan Kolkata club laka point thum hlawhchhuah hi a pawimawh dawn a ni. 

Mohammedan an chak a nih chuan Aizawl FC beisei a chau khawp ang. A chhan chu Trau hi an khingpui tur Sudeva Delhi aiin an ṭha zawk a, Kolkata club leh Manipur club-in point thum an hmuh ve ve chuan Aizawl FC hi champion tur zawnnaah an tel thei dawn lo.

Aizawl FC vanneihna chu result hre sain an khel thei dawn a, match pahnihah an hmalam hun a innghah avangin Real Kashmir emaw Sudeva Delhi emawin an beiseina an tih hlawhtlinsak ngei a rinawm.

Yan Law hote beiseina neia Chennai City an hmachhawn a nih ngat chuan point thum an hlawhchhuah ngei a ṭul dawn. Aizawl FC hian an match hnuhnung berah Real Kashmir 3-1 ngawtin a hneh lo a, hun harsa an hmachhawn a ṭul phah ta a ni.