April thleng chawl tur Hendo

Kar hmasaa Everton nen an inkhelh ṭuma inhliam Liverpool captain Jordan Henderson chu April thleng a chawlh a ngai dawn a, Liverpool tlarhnung buaina a pun lun zel. 

Merseyside derby-a 2-0 a an tlawm ṭuma first half-a ṭhal hliam vanga lakchhuah Hendo hi zai a ni a, a inenkawl mek. 

Reds hian hliam vangin defender zingah Virgil van Dijk, Joel Matip leh Joe Gomez-te chu an chhawr thei lo mek a, anni inhliam karah hian midfielder Fabinho leh Hendo hi centre back-ah chhawr ṭhin an ni. 

Brazil international Fabinho pawh hliam vangin a chawl mek a, Hendo-a inhliam leh tak bawk avangin Reds hian tlarhnung laia chhawr turin January-a an lei thar pahnih Ozan Kabak leh Ben Davies bakah tawnhriat nei tlem Rhys Williams leh Nathaniel Phillips-te chiah an nei tawh. 

Liverpool chuan, "Hendo lo kir hun tur hi chiang takin sawi theih a ni lo a, mahse, March international break thleng hi chu a inkhel thei dawn lo tih a chiang a ni," an ti. 

International break hi March 24-31 inkara neih tur a ni a, Hendo hian Reds tan match nga chu a khel thei dawn lo chiang tihna a ni a, heng zingah hian Premier League-a Chelsea an hmachhawn tur leh Champions League last 16 second leg-a RB Leipzig an mikhual tur chu a tel. 

Liverpool hian chanchin lawmawm erawh an nei tho a, VVD chuan amahin training a nei leh tawh a, forward Diego Jota chuan a ṭhiante training a zawm ve leh thei tawh bawk. 

Reds hian Pathianni zan dar 12:45-ah league match khel turin Sheffield United an lenchilh dawn a, league match li chhung a zawna tlawm tawh team hian season tharah Champions League khelh an duh a nih chuan tlawm a thiang tawh lo ang.