Solskjaer hoin United-in Stamford Bridge zawh chim

Manchester United chuan Ole Gunnar Solskjaer kaihhruaina hnuaiah Chelsea kulhpui Stamford Bridge luhchhuahin FA Cup quarterfinal an lut. Thawhṭanni zan inkhelah hian United tan Ander Herrera leh Paul Pogba ten goal an khung a, Paris Saint-Germain laka an tawlh thluk hnuah an tho chhuak.

Blues manager Maurizio Sarri erawh ban theih dinhmunah a ding. February 24, Pathianni zan hian Chelsea-in League Cup final-ah Manchester City an hmachhawn dawn a, Italian manager hun hriltu inkhel tih pawhin a sawi theih ang. London club hian City hi 6-0 ngawtin an hneh tawh lo a, Chelsea ṭantute pawhin Sarri hi an au el tawh.

Banker hlui Sarri hi pa ti kher kher a ni a, duh dan bik neiin a khelh dan hmang chu 'Sarri Ball' tih a ni a. Chelsea-ah pawh he khelh dan hmang hi chhawm zel tumin Jorginho chu ball semtuah a hmang a, 'Game Plan A' hi a kalfuh rih lo chungin thil thar zawng loin a duh dan hi kalpui ngar ngar.

United nen hian Chelsea-in an player neih ṭhat ber an thawhchhuah pui a, Eden Hazard leh Gonzalo Higuain te chu hmatawngah awmin Jorginho bawkin midfield a la luah lum. PSG-in United an hneh ṭumin Marquinhos-a'n United khai dingtu Pogba a dah ṭha a, Sarri hian Brazilian midfielder tih ang titheitu N'Golo Kante a nei chungin a tum dan a thlak lo.

Solskjaer erawhin Anthony Martial leh Jesse Lingard te a chhawr thei lo a, heng player pahnih leh Marcus Rashford chu hma tawngah a hman ṭhan ni mah se an tel loin game plan ṭha tak 'Plan P' a duang chhuak, chumi awmzia chu Pogba-a'n hmun pawimawh a chang.

Juan Mata chuan number 10 role chang mah se a ṭul dan a zirin Pogba nen an inthlak thleng a, French midfielder hi zalen taka tlanchhuah phalsak a ni a. Tlarhmaa awm Rashford leh Romelu Lukaku ten midfielder te an tawlh hma theih nan mual sirah an che tla ṭhin bawk.

Jose Mourinho hnuaia ṭha taka up 'Pogba' chu Solsjkaer-a'n aṭawih hmaa la chhuakin a hmin ṭha tawh khelmualah a hmuh theih. Minute 31-naah mual vei lam aṭanga French midfielder ball vawrhluh duhthusam chu Herrera-a'n a tauh lut a, goal class sang tak a ni.

Goal hnihnaah Pogba a langsar lehzual a, halfway line bul aṭangin dinglama awm Rashford chu pein English forward ball cross chu a tauh lut leh hman. Minute 45-naa goal luh danah Pogba ṭhat zia a lang a, khawvel keeper manto ber Kepa Arrizabalaga erawhin 'ṭha ber' ni turin hmabak a la ngah tih hmuh theih tel bawk.

Manchester United-in first half-a goal hnih an khung hnuah hun chanve hnu lamah goal venhim hna an thawk a, Chelsea-in an an khelh dan 'Sarri Ball' hmangin United tlarhnung an ṭhiat thei lo. David De Gea aia lut Sergio Romero-a'n vawi hnih chiah dan tur a nei a, Argentine keeper hian first half-ah David Luiz-a pet chu dangin hemi per Pedro-a volley nghal chu a dang leh bawk.

Chelsea ṭantuten Sarri hnuaia an team khelh danah an lungawi tawh lo. United ṭantuten "Naktukah ban i ni dawn' tiha an au rualnaah pawh Blues ṭantuten an rawn zawm a, a dinhmun a derthawng. Sarri chuan, "Min ṭantute lam aiin kan result ka ngai pawimawh zawk. League Two ka nih lai khan ka hlauthawng ṭhin a, tunah chuan hlauhthawnna ka nei lo," tiin a sawi.

Italian manager chuan sawi chhunzawmin, "First half chu kan khel ṭha a, second half-ah erawh kan khelh dan hmangah ka hre fuh chiah lo," tiin a sawi a, chutihrualin Higuain-a'n Cesar Azpilicueta leh Jorginho hnen aṭanga ball hmuh goal-ah chantir ve ve se result leh an thlir dan a dang thung ang.

Chutihrualin Sarri khelh dan hmang erawh a rinlawk theih hle. Midfielder Mateo Kovacic chu vawi 19 zet an thlak tawh a, chung zinga vawi 13-ah chuan Ross Barkley-a'n a rawn thlak.

Sarri hma chiaha Chelsea manager Antonio Conte kha FA Cup a chawi chungin ban a ni a, League Cup nomawi hian Sarri a chhan zo ang em tih pawh zawhna chhan har tak a ni a. Player nen an inkarah fel lo a awm bakah supporter lehzelin an thlawp tawh loh avangin Stamford Bridge-ah hun a rei hmang tawh kher lo ang.

Ole Gunnar Solskjaer tan Chelsea hi fiahna pawimawh bik a ni a, PSG an hneh loh hnua an khelh dan hmang hian a hna thlengin nghawng a nei dawn. Norwegian manager hoin United hian Stamford Bridge-ah hnehna an chang a, manager lakna tura 'interview' a nih chuan Solskjaer hi manager nghet tur ngei chu a ni ang.

United manager lailawk Solskjaer chuan, "Kan game plan a hlawhtling, Ander Herrera leh Paul Pogba te kha tawlh hma kan phal sak. Second half-ah kha chuan goal venhim kan tum ber a ni a, chu chu ka lawmna a ni," tiin a sawi a, an supporter-te chu khawvela ṭha ber tiin a fak bawk.

Amaehrawhchu, United hian Pathianni zanah an hmelma Liverpool an mikhual dawn a, hna nghet nei turin 'interview' dang chu a hmachhawn leh a ṭul dawn niin a lang.

FA Cup fifth round match hnuhnung ber khelh zawh hlan quarterfinal fixture pawh nghal a ni a, Premiere League Club ṭha pahnih Manchester City leh Manchester United te chu pawh fuh an ni lo a, Ole Gunner Skolsjaer hote chu a lawm zawk niin a lang.

Manchester khaw club pahnihin khualmual a an chang ve ve a, City hian championship club Swansea an hmachhawn dawn a, United-in Molineux Stadium-ah Wolverhampton Wanderers an hmachhawn dawn thung.

Solskjaer chuan, " Arsenal leh Chelsea te khualmualah kan hneh a, tunah khualmualah Wolves kan khelhpui leh dawn a, kan kalkawng hi a harsa a ni," tiin Old Trafford-a khelh a chak ve tawh thu a sawi.