Nani-a'n Orlando City a pan

Manchester United winger Nani chuan Sporting Lisbon aṭangin Major League Soccer club Orlando City chu free transfer-in a zawm a, season thum cham turin contract a ziak.

Kum 32 mi Nani hian 2007 khan Man United a zawm a, English club tan hian season riat hun a hman chhungin Premier League nomawi pali leh Champions League pakhat a chawi hman. United hnuah hian Fenerbahce, Valencia leh Lazio tan te a khel leh a, chumi hnuah a bul ṭanna Sporting-ah nikum July thla khan a kir.

Portugal tana match 112 khel tawh Nani chuan, "Ka hun tawn mekah hian lawmna tak tak ka neih rualin a lunglen thlak zawng pawhin a ngaihtuah theih. A eng zawnga thlir ka duh a, tunah chuan chona thar hmachhawn ka châk tawh hle.

"Sporting hi ka tan chuan engkima engkim a ni a, engtik niah mah ka theihnghilh tawh ngai lo ang. Amaherawhchu, a chang chuan hringnun hian kan tana ṭha tur zawka min hruai chang hi a awm ve bawk," tiin MLS lam a pan chhan a sawi.

Nani hian ram tan goal 24 a khung tawh a, Euro 2016 khan an ram hi champion puiin final-ah a thlengtu leh champion tur rinkai ni bawk France chu 1-0 in an hneh.