A inzir chhuahna hmunah Sane let dawn

Manchester City chuan zanin dar 1:30 hian Veltins Arena-ah Schalke an hmachhawn dawn a, helai hmun hi Leroy Sane inzirchhuahna a ni.

Pep Guardiola-a'n player a thlak kual danah Sane-a'n a club hlui hmachhawn turin bul a ṭan dawn em tih la hriat loh mah se an inkhel turah hian Germany international chanchin hian sawi a hlawh ber.

Schalke youth coach Nortbert Elgert chuan, "City a zawm khan a la naupang hret avangin a hma mah mahah ka ngai a, ka lo chhutsual zawk a ni," tiin City tana Sane khelh dan chu a beisei phak bak a nih thu a sawi.

Sane hi infiammi chhungkua aṭanga seilian a ni a, a pa Souleymane Sane hi Senegal international niin a nu Regina Weber chu 1984 Summer Olympics-a bronze medal la thei a ni.

Rawlthar a nih lai hian Sane-a'n a taksa a chak theih nan party-naah a kal ngai lo a, Schalke erawh thutlukna siam sualin kum 14 mi niin Bayer Leverkusen tan season hnih khelin hemi hnuah hian a kir leh thung.

Coach Elgert ho hian kum 2015 khan Sane telna Schalke chu Germany youth champion an ni a, Under 19 final-a an hneh hi Julian Nagelsmann-a enkawl Hoffenheim an ni.

Senior team-ah erawh Robert Di Matteo hnuaiah bul ṭanin Andre Breitenreiter hnuaiah nasa takin hma a sawn zui a, Royal Blues tan hian match 57 khelin goal 13 khungin assists vawi riat a nei a. Pep Guardiola-a'n Bayern Munich a enkawl lai khan hmu fuhin Man City a zawm hnuah lakluh hmasak a nei nghal a, kum 2016 nipui khan pound maktaduai 45 in an lalut.

Tunah chuan Sane hi khawvel winger ṭha ber zinga mi ani tawh a, match 118-ah goal 76 a khung tawh. Schalke captain Ralf Faehrmann chuan, "Schalke supporter zawng zawngin a club khelhna chu eng pawh ni se a khel hi an hmu châk dawn. Schalke ṭantute hi chu German ṭantu an ni a, Sane hlawhtlinna hi an lawmpui ang," tiin a sawi.

An inkhelh dan tur sawiin Ralf Faehrmann chuan, "Football-ah chuan engpawh a thleng thei a, hlauthawng loin kan chance neih kan hman thiam a ṭul. Counter-attack, corner leh set piece dang te kan hman ṭhat a ngai ang.” tiin chak tuma an khelh tur thu a sawi.

Manchester City hian Champions League-ah sulhnu ṭha la nei lo mah se Pep Guardiola hnuaiah nasa takin hma an sawn a, khawvel team ṭha ber zingah chhiar tel an ni tawh. Tun season-ah nomawi pali Champions League, Premier League, FA Cup leh League Cup-ah an la champion thei vek.

City hian Schalke an hmachhawn hma hian Newport County chu FA Cup-ah an hneh a, hemi ṭuma goal hnih khungtu Phil Foden chungchang sawiin Pep Guardiola chuan, "Phil hian a position-a player dang Kevin De Bruyne, Ilkay Gundogan, Bernardo Silva leh David Silva te elpui turin a ṭha tawk a, chhawr theih turin a hman tlak," a ti. 

Man City hian Champions League-a German club an hmachhawn hnuhnung pasarihah an tlawm lo a, Eithad Stadium-a an hna a awlsam theih nan an record hi vawn nun an tum ang.