Tyson Fury a hausak belh ESPN nen inremna siam

Tunlai boxing khawvela hming langsar ber pawl Tyson Fury a hausak belh a, ESPN nen pound maktaduai 80 hu inremna an ziak. 

Inremna ang chuan ESPN hian Fury-a'n inhnek a hmachhawn leh tur panga chu en theihin US bikah an chhawpchhuah sak dawn a, UK-ah chuan BT Sport-in an la chhuah chhunzawm zel ang. 

Fury leh ESPN inremna hi pound maktaduai 80 a nih avangin US television channel hian Fury inhnek vawi khat an chhuah manah pound maktaduai 16 zel an pe dawn tihna a ni. 

December khan Fury hi WBC world heavyweight cham­­pion Deontay Wilder nen US-ah an inhnek a, heta ṭang hian US market lama a hlutna hi a san belhchhah niin a lang. 

Fury-a'n ESPN nen inremna an ziak tih a chian rualin boxing ngainatuten zawh an nei nghal a, Deontay Wilder nen an inhnek leh tho ang em, tih chu an zawhna a ni. 

Boxer pahnih hi December khan an intawng tawh a, inhneh­tawkah puan an nih avangin inhnek nawn leh tura tih an ni a, mahse Wilder hi Showtime nena thawkdun lai an ni. 

Chumi awmzia chu US-a boxer pahnihin broadcasting lama an thawhpui hi channel inhal tak ve ve an ni a, an in­hnek pe chhuak tura contract an neih ve ve bawk si avangin thil fel lo a awm thei. 

Fury promoter Frank War­ren erawhin harsatna awm phah turah a ngai lo. Warren chuan, "Tunah chuan kan kutah thutlukna a innghat tawh a, a sawifel lam hna chu kan tihtur a ni," tiin boxer pahnih hi inhnek tir ngei a tum. 

British boxer Fury-a'n a contract thar vanga buaina a awm a ring lo a, Wilder hnek ngei a duh thu a sawi. Kum 30 mi fighter chuan, "Wilder hmachhawn duh lo ni ila, a vawi khatnaah khan ka fight miah lo ang. 

"Ka deal thar avang hian rematch neih chance a sang zawk a ni. Deontay, he ka thusawi hi i lo en a nih chuan lo ngai rawh. Tukdawl tur chein ka lokal dawn a ni," tiin a cho hle. 

Fury hi a contract thar avang hian Warren bakah promoter lar Top Rank CEO Bob Arum chuan a kaihruai tawh dawn tihna a ni a, Bob Arum hi chuan US bikah a enkawl ang. 

Muhammad Ali leh Floyd Mayweather pawh lo kai­hruai tawhtu Arum chuan, "Heavy­weight talent ropui tak nei, a vanglai hun hmang mek a ni," tiin Fury an thawhpui chhan a sawi. 

Tunlai heavyweight boxing-ah chuan Fury, Wilder leh Anthony Joshua te chu hming langsar bera chhal ngam an ni a, boxer pathumte inhmachhawn kual hi mipui hmuh chak a ni. 

Fury leh Wilder hi Warren sawi ang takin awlsam takin lo inhmachhawn thei ta pawh ni se he inhneka chak zawk hi Joshua hmachhawn tur anga ngaih an ni a, mipuiin hei hi an nghakhlel hle. 

Mahse, Fury ber hian inremna thar a neih ve leh takah chuan boxer pathum hian US bika an inhnek pe chhuak turin thawhpui hran ṭheuh an nei tihna a ni a, hei hian inbiakna kawngah harsatna tam tak a thlen dawn tih a chiang. 

IBF, WBA leh WBO cham­pion lai Anthony Joshua hi US bikah chuan DAZN nen an thawk­dun mek - ani hian June 1 khian Jarrell Miller chu a title humhim turin a hmachhawn ang.