Champion tum Dortmund an chelh

Borussia Dortmund tan Bundesliga nomawi chu awlsam taka chawi mai theih a ni dawn lo. Thawhṭanni zan khan table mawngphaha awm Nuremberg khelmualah lenglutin goal awm loin an inhnehtawk a, cham­pion lai Bayern Munich aia an sanna chu point thum chauh a ni ta.

Max Morlock Sta­dion-a inkhelah Dort­mund tan Mario Gotze-a'n minute khat chhung lekin hun ṭha tum thum nei mah se Nuremberg keeper Christian Mathenia chuan a dan sak vek a, point khat an hlawh chhuah theih nan tha a thawh hlawk hle.

Lucien Favre-a naute hi tun hnaiah an chefuh hleithei lo, inelna hrang hrangah a zawnin match nga chhung chak ni hmel an hmu ta lo. 2015 March thla hnua a vawi khat nan match zawnin goal an khung lo a ni.

Germany-ah chuan Thawhṭanni zana league match khelh hi an duh lo hle a, tuna an inremna hi 2021-22 season thleng daih tur ni mah se dodalna a nasa hle. Dortmund leh Nuremberg inkhelh lai pawhin fans lamin an duh lohna an lantur nasa. Khelmualah tennis ball dum an vawm luh avangin ṭum hnih ngawt inkhel hi chawlh lailawk a ngaih phah hial.

Champion lai Bayern-in Zirtawpni zan khan Augsburg an hneh avang­in an inkar a zim leh ta hle a, league match 14 ngawt khelh hmabak an la neih avangin champion tur hriatthiam a la har hle.