FC Goa tan semifinal a chiang
Indian Super League semifinal-ah FC Goa an khel dawn chiang. Goan club hian Thawhṭanni zan khan an mikhual Kerala Blasters chu 3-0 in an sawp a, palina aia hniamah season tawp an khar thei tawh lo.
FC Goa tan hian ṭum dang ang bawkin Ferran Corominas chuan goal hmahruai a khung a, tun season-ah goal 14-a khungna niin ISL kal mekah ani aia goal khung hnem an awm lo - amah hnaih bertu NorthEast United striker Bartholomew Ogbeche chuan goal 12 a khung tawh.
Goan club tan hian Edu Bedia leh Hugo Boumous te chuan goal khat ve ve an thawh ve bawk a, Blasters-in a chhanletna tur an neih loh avangin 3-0 in an tlawm. Blasters tan Lalruatthara chuan inkhel bul a ṭan a, minute 68-naah lakchhuah a ni.
Zanin dar 7:30-ah NorthEast United an inlan dawn a, Pune City lakah hnehna an chang a nih chuan a sang pali zingah an tel chiang ang - Bengaluru chu semifinal khel tur chiang an ni tawh bawk.