Chennai City-in champion kawng an zawh

I League champion inumah hmahruaitu Chennai City chuan Shillong Lajong chu khual­mual­ah 4-2 in an hneh a, anmahni hnaih bertu East Bengal aiin point ngain an sang fal a, match khatin an khel tam thung.

South Indian club tan Pedro Manzi-a'n goal hnih khungin San­dro Rodriquez leh Nestor Gordillo ten goal khat ve ve khungin Shillong Lajong tana Kitboklang Pale leh Samuel Kynshi te goal khung chu scoreline timawitu chauh a ni.

Chennai City-in nomawi chawi ngei an tum a, Neroca FC aṭanga an lakluh keeper Mauro Boerchio chuan Lajong nen an inkhelh ṭum hian bul a ṭan nghal a. Khelmualah erawh Chennai City Spanish player-te bawk an langsar a, Sandro Rodriquez chuan minute sarihna lekah corner aṭangin a pet lut a, Lajong keeper Phurba Lachenpa-a'n a dang thei lo.

Lajong harsatna belhchhah turin Lachenpa chu inhliam vangin lakchhuah a ni a, tawn­hriat nei tlem zawk Neinthovilie Chalieu a rawn lut. Chennai City lamin Lajong substitute goal­keeper an fiah hmain mualneitu lamin Chennai City keeper thar an fiah thung a, Kitboklang Pale chuan minute 21-naah Mahesh Singh hnen aṭanga a ball hmuh chu siphurh sut nan a hmang.

Chennai City-in goal dang an khung lawk lo a, goal khung htei thei bik player an neih chu an vanneih pui. Minute 78-naah Pedro Manzi chuan Sandro cross chu a tauh lut a, minute thum hnuah Pedro cross chu Nestor-a'n a tauh lut ve bawk.

Lajong lamin Samuel Kynshi penalty hmangin siphurh sut ṭhen mah se Pedro Manzi-a'n minute 90-naah chak nemnghehna a khung. Tun season I League khelh mekah Pedro hian goal 18 a khung tawh a, Churchill forward Willis Deon Plaza nen goal khung tam ber an ni mek.

I League-ah cham­pion inum club pathum an awm a, Chennai City hi an hnuaia awm East Bengal leh Real Kashmir vangin ngaih ṭhain an la awm thei lo.

Chennai City hian Khalid Jamil-a en­kawl Mohun Bagan an hmachhawn dawn a, heta hnehna an chang thei a nih chuan buaina tam zawk chu sut kianin a awm thei ang a, chutihrualin East Bengal point chhuhsaktu Churchill Brothers leh champion lai Minerva Punjab te an la hmachhawn dawn avangin match thum hmabakah point kua chu an hmuh bik a rinawm loh.

Hetihlai hian an elpui East Bengal leh Real Kashmir te hi an la inhmachhawn dawn a, hemi resutl hian nomawi inumah nghawng a nei dawn. Mizo tlangval Lalrindika Ralte, Lalramchullova, R. Laldanmawia leh Brandon VL Remdika te khelhna Kolkata club hi history an siam pui thei a, Bengali thu­thar thehdarhtuten East Bengal chanchin an ngaihven miau avangin I League nomawi inum boruak a len phah hle.