Sportsman of the Year atan Djokovic

Infiammite tana chawimawina sang leh ngaihhlut Laureus World Sports Awards chu Thawhṭanni zan khan France khawpui pakhat Monaco-ah sem a ni a, tennis world number 1 Novak Djokovic chu Sportsman of the Year atan thlan a ni.

American Gymnast, 2018 World Championship-a gold medal pali bakah silver leh bronze medal pakhat ve ve latu Simone Biles chu Sportswoman of the Year chawimawina an hlan. Award dang dawngtu zingah Arsene Wenger, Tiger Woods leh Naomi Osaka te chu hming langsar an ni bawk.

Award ngaihhlut Sportsman of the Year dawng thei tura hming chhawpchhuah an hraw hlawm hle. Car intlansiakna sang ber Formula 1-a a vawi nga nana champion Lewis Hamilton, Basketball star ropui Lebron James, World Cup-a France champion puitu Kylian Mbappe, football player ṭha chawimawina sang Ballon d'Or dawngtu Luka Modric leh long-distance runner lar Eliud Kipchoge te an ni.

A ṭha rual zingah season hmasa chhunga US Open leh Wimbledon nomawi chawitu Djokovic thlan a ni a, he chawimawina hi Serbian tlangval hian a ṭum li nan a dawng a ni. A hliam dam hnuah season a hman ṭhat em avangin tennis legend pahnih Roger Federer leh Rafael Nadal te nek chhuakin world number 1 nihna a luah.

Kum 31 mi Djokovic chuan, "Hliam vanga buai reng hnua hetiang dinhmun han luah leh mai chu thawnthu ngaihnawm tak ang mai a ni, eng tiang in nge ka khelh ṭhat leh theih chu hre lo mah ila, tumna leh beiseina a awm chuan eng pawh a tih theih tih a chiang," tiin a sawi.

Hmeichhe tennis world number 1 Naomi Osaka chu Breakthrough of the Year atan thlan a ni bawk a, Japanese nula zinga Grand Slam champion hmasa ber turin Osaka hian US Open nomawi a chawi bakah, world ranking-ah 72 aṭangin kum bul ṭan mah se tun dinhmunah chuan a chung bera awm khawpin a khel ṭha tluang mek a ni.

"Tum chuan kawng a awm" tih thupuia neitu Henrieta Farkasova chu vohbik tana siam Sportsperson with a Disability of the Year hlan a ni. Slovakian nula hi mitdel a ni a, mahse a beidawng ve ngai lo. Nikum Winter Paralympics-ah khan vur tawlh Alpine skiing huangah gold medal pathum ngawt a la.

Chinese mi tumruh Xia Boyu-a hnenah Best Sporting Moment hlan a ni, he award bik hi mipui thlan a ni. Xia hi a pian tirh chuan ke pahnih a nei pangngai a, mahse 1975 khan tlang a lawnna lamah chesualin a ke pahnih a chan! Ke nei tawh lo mah se a thil tum a thlak chuang lo.

Ke lem pahnih a hman hnuah 2014, 2015 leh 2016 te khan khawvel tlangsang ber Mount Everest lawn chhuah tumin a bei nawn tho a, mahse vur tawlh, lirnghing leh vur sur nasa lutuk vangin a lawn chhuak thei lo. May 14, 2018-ah erawh Chinese mi ke pahnih bul chunga lawn chhuak thei hmasa ber a ni.

Xia chuan, "Khawvel tlang sang ber lawn chhuah hi ka thil tum leh chak ber a ni a, harsatna leh hrehawm tam takin min tlakbuak mah se beidawng loa kan beih chuan a tawpah hlawhtlinna a awm ṭhin," tiin a sawi.

Golfer lar Tiger Woods-a'n a hnungzâng na vanga buaina hrang hrang a tawh hnuah Season-ending Tour Championship-ah hnehna a chang ve leh a, major title 14 la tawh hian kum nga chhunga a hlawhtlin lehna hmasa ber niin Comeback of the Year chawimawina hlan a ni chu lawmpuitu an tam hle.

Football inelna lian leh ngaihhlut ber FIFA World Cup champion France chu Team of the Year atan thlan an ni a, chawimawina hi coach Didier Deschamps-a'n a dawng. Award dawng tura chawpchhuah zingah F1 champion Mercedes, NBA champion Golden State Warriors leh Norway Winter Olympic Team te an awm bawk.

Arsenal manager hlui Arsene Wenger-a'n season hmasa khan North London club a chhuahsan a, tun thlengin team enkawl loin hun a la hmang. French pachal hi a hna lo thawh tawhte avangin an la theihnghilh lo a, a kutah Lifetime Achievement Award hlan a ni.