Madrid khawpuiah Ronaldo a kir

Cristiano Ronaldo chuan hun rei tak a lo awm tawhna Madrid khawpui a rap leh ta. Tun ṭumah erawh thawnthu a dang a, Juventus jersey ha chungin Real Madrid tan a khelh laia an hmelma kumhlun Atletico Madrid a hmachhawn dawn. 

Zanin dar 1:30-ah Atletico Madrid hian Champions League last 16 khel turin Juventus an mikhual dawn a, Ronaldo vang ringawt pawhin he inkhel hi en chaktu an tam dawn. 

Juventus coach Massimiliano Allegri chuan, "Kawng engkima team inbuktawk tak kan ni a, quarterfinal luh kan tum chuan Madrid khawpuiah hian goal kan khung ngei a ngai ang," a ti. 

Allegri ṭawngkam aṭanga thlir chuan Juventus hian attacking football an khel ngei dawn niin a lang a, chumi tur chuan player an nei bawk - Atletico erawh an tlarhnung khauh tak hi an hmingṭhatpui a ni. 

Juventus hian Italian football-ah chuan hun rei tak chhung ro an rel tawh a, tuna an duh ber chu European champion nih a ni - an beiseina ti hlawhtling thei tura an beisei chu Ronaldo a ni a, nipui transfer-ah football khawvel barakhaihin an lalut. 

Kum 34 mi forward hian Champions League-ah ringawt goal 121 a khung tling tawh a, Juventus-in an beisei ti hlawhtling thei tura an ngai hi a mak lo - Atletico tan Ronaldo ven bik a fuh dawn tihna a ni.

Ronaldo hian Atletico vawi 30 a hmachhawn tawh a, chung zingah chuan vawi 21 goal khungin assist vawi riat a nei - vawi 15 hnehna chang lamah a ṭang a, vawi riat a tlawm a, vawi khat hnawhchhuah a ni bawk. 

Champions League-ah pawh 2014 final-ah khan Real Madrid-in 4-1 in Atletico hi an sawp a, Ronaldo hian penalty hmangin goal lina a khung - season hmasa khan semifinal-ah Real tan hattrick siam nan a hmang bawk. Atletico tan heng zawng zawng hi theihnghilh a thiang lo. 

Atletico hi Madrid derby-a an chak loh hnu lawkah Rayo Vallecano lakah 1-0 in an chak a, coach Diego Simeone-a'n contract thar a ziah hnuah an phur thar niin a lang a, Juventus hian duh thlang thei se last 16-a Atletico hmachhawn hi an thlang kher lo ang. 

Juventus hian Ronaldo an neih an chhuang a nih chuan Atletico hian Antoine Griezmann an nei ve tho - kum 27 mi forward hian tun season-ah goal 18 a khung fel leh der tawh a, last 16 aṭanga Champions League mangṭha ringawt chu a duh dawn lo. 

Atletico hian Champions League nomawi chhuan tur la nei lo mah se tun hnaia an record enin European football-ah chuan team tum chakawm lo ber pawl an ni  - tun hnai season ruk chhungin vawi nga chu last 16 an lut a, vawi hnih final an thleng. 

Mahse, an hmaa ding tur hi Juventus an ni miau a, Atletico boss Diego Simeone chuan, "Kan tan chuan final a ni a, ke chheh sual a thiang lo," a ti. 

Atletico Madrid tan hliam vanga chawlh reng hnuah Diego Costa leh Stefan Savic chu Juventus hmachhawn turin an dam leh tawh a, Koke-a'n club training a zawm leh tawh bawk. 

Juventus striker hlui Alvaro Morata-a'n Spain a kir hnuah beisei la phak lo mah se a club hlui a hmachhawn ngei a beiseiawm a, tlarhmaah Griezmann nena an inkawp tur chu hmachhawn chakawm a ni lo. 

Italian club tan Paulo Dybala chu Ronaldo thlawp tura a luh rin a ni a, Mario Mandzukic chu inkhel bul ṭan tura beisei a ni bawk - tlarhnung nghet Atletico tan hna a hautak ang. 

Tun season Champions League final hi Atletico khelmual Wanda Metropolitano-ah khelh tur a ni dawn a, Griezmann chuan, "Hei hi kan tan chuan minti phur lehzualtu a ni," a ti a, final luh a tumruh hle - an hna hmasa tur chu last 16 paltlang a ni.