Mizo 6; Odisha 6; East Bengal 5!

Inrinni zan Indian Super League inkhel chu Mizote tan chuan zan chhinchhiahtlak a ni - Odisha FC chuan 6-5 in East Bengal an hneh a, goal lut 11 zinga goal ruk hi Mizo footballer khung a ni!

East Bengal tan Anthony Pilkington chuan goal hmahruai khung mah se Lalhrezuala Sailung chuan ISL-a a goal hmasa ber hmangin Odisha tan a chhanglet a, 1-1 a ni.

Kolkata club bawkin goal an khung leh a, Odisha forward Manuel Onwu-a ball petchhuah tumin keeper Ravi Kumar-a hmai a pet per a, an lamah a ti lut daih - chawlhlawkah 2-1 a ni. 

Second half a ni a, a changtupa inlan hun a thleng - Mizoram Premier League chhul chhuak Paul Ramfangzauva leh Jerry Mawihmingthanga ten goal hnih ve ve an rawn inkhung chhawk!

Kolasib tlangval Paul-a goal khung pahnih hi penalty pawn aṭanga lut ve ve a ni a, a thiam dan ang takin Aizawl FC midfielder hlui hian a khung - Paul hi hero of the match atan thlan a ni.  

Chanmari tlangval Jerry-a goal khung a danglam lo - Onwu hnen aṭanga a ball hmuh chu ṭha zetin a tauh lut a, Diego Mauricio ball siamsak chu ṭha zetin a khung bawk. 

Mizo tlangval goal inkhung chhawk karah Aaron Amadi-Holloway chuan East Bengal tan a khung ve leh a, mahse, Odisha tan Mauricio chuan goal hmangin Kolkata club phur lutuk tur a rawn bengdai. 

Bench aṭanga luhtir Jeje Lalpekhlua'n beisei tur a la awm tih pholangin East Bengal tan a khung ve leh a, Hnahthial tlangval hian a la 'class' reng tih a goal hmangin a pholang. 

Hun pek belh minute nganaah Holloway chuan a khung ve leh bawk a, mahse, Kolkata club-in goal an chhuah hnem hret avangin awmzia erawh a nei phak lo. 

East Bengal hian ISL-a an season hmasa berah pakuana ni chungin season an khar a, Odisha erawh table-ah 11-na an ni mek.