Vawiinah Mizoram match hnuhnung

Vijay Hazare Trophy (2020-21) khelh laiah vawiin chawhma dar 9:00 hian Mizoram chuan an group match hnuhnung ber atan Assam an hmachhawn ang, inelna hi Chennai khawpuia neih a ni.

Mizoram hian an match hmasa lamah chak ni hmel an hmu lo a, knockout stage luh beiseina an nei tawh lo. Assam erawh plate group-ah pahnihna an ni mek - an chunga awm Uttarakhand an chetsual chuan tlang thei an la ni.

Inrinni khan Mizoram hian Uttarakhand an hmachhawn a, wicket riatin an chak lo. Indian Super League khel tawh Dikshanshu Negi an ngam lo, kum 30 mi Negi hian over nga a vawm aṭanga wicket ruk lain Mizoram an che thei lo.

Mizoram innghahna Pratik Desai-a'n run li chauh a siam a, tualchhung tlangval zingah pawh run siam hnem thei an awm lo. Meghalaya leh Nagaland an khelh ṭuma khel ṭha player ho pawh an vanneih ni a ni thei bik lo a ni.

Kumin Vijay Hazare Trophy-ah Mizoramin chak ni hmel an la hmu lo. Amaherawhchu, season danga an phak loh viau ṭhin Meghalaya leh Nagaland nen an inkhel tawk viau a, vanduai vangin an chak lo. Point hmuh beiseina Arunachal Pradesh nen an inkhelh tur chu khuain a bumro bawk.