Dan theih loh Manchester City

Manchester City chak tluang lai dang thei an awm lo. Pep Guardiola naute hian an mikhual West Ham 2-1 in an hneh a, inelna hrang hrangah a zawnin match 20 zet hnehna an chang tling ta.

Pep Guardiola-a'n player siksawi nual mah se buaina an nei lo a, defender pahnih Ruben Dias leh John Stones ten goal an khung. Mikhual team goal neih chhun hi Michail Antonio khung a ni thung.

Man City hian tun hnai season li chhunga a vawi thum nan Premier League nomawi an chawi leh ngei dawn niin a lang ta. An elpui leh pahnihna ni lai Manchester United lakah point 13 zetin an sang fal.

Sergio Aguero chuan nikum October 1 hnua a vawi khat nan Premier League inkhel bul a ṭan ve leh thei tawh, forward Raheem Sterling, midfielder Phil Foden leh defender ball thiam Joao Cancelo te chu bench lamah dah an ni.

Tlarhma pui turin Kevin de Bruyne a awm a, Belgium international chawlh laia che ṭha tak Ilkay Gundogan chu tlarhma lam aiin a hnung lam venpui tura dah a ni zawk - tlarhnung laiah Dias leh Stones an inkawp thung.

Midang goal khung tur siamsak thiam De Bruyne chu minute 30-naah a inlar, yard 40 vel zeta hla aṭangin box chhunga Dias awm a hmu fuh nalh. Tauh nuam tawk tura a ball vawrh luh chu Portuguese defender hian chiang zetin a tauh lut.

West Ham striker Antonio-a'n a hun ṭha hmasa chhawr ṭangkai thei lo mah se a chesual reng duh lo. Chawlhlawk hma deuhin buai deuh nuaih karah hnai tak aṭangin si phurh a sut a, tlarhnung phui vanga fak hlawh City an hawihai hle.

A thiam zawk thup reng theih a ni lo. Hammers lamin an tlarhnung rem khawng viau mah se mual sira awm Riyad Mahrez chuan amah vengtu a bum hnuah vengtu nei lo Stones a pass a, English defender hian khung turin harsatna a nei lo.

Manchester City manager Guardiola chuan West Ham chu hmachhawn harsa tak an nih thu a sawi. Pep chuan, "Player an nei ṭha a, tharum an ngah bawk. A tir lamah phei kha chuan an tlarhnung kha ṭhiah a harsa dawn hle niin a lang hman.

"League bakah Champions League khelh tur a tam a, hawhchawlhna hun awm mumal loin match khelh hmabak atan inbuatsaih zel a ngai. Hetiang hun chep tak kara point thum kan hmu thei ṭhin hi a lawmawm lai chu a ni," tiin a sawi.

West Ham manager David Moyes chuan, "Ka nauten an khel ṭha em em a, point kan hmu lo kha thil pawi tak chu a ni. Team indinthar mek kan ni a, a sang thei ang ber thlen tum ni mah ila season thara European football khelh ngei chu ka tiam thei lo," a ti.

Hammers hian match 26 aṭangin point 45 an hmu thei a, palina dinhmun an luah mek! An hnuaia awm Chelsea aiin match khatin an khel hnem zawk, season chawhnu lamah an chesual viau a nih loh chuan Europa League an beisei ngam ang.

Manchester City hian Thawhlehni zanah Wolverhampton Wanderers an mikhual zui leh dawn. West Ham erawhin chawlhna hun an nei rei deuh dawn, March 9-ah Leeds United nen an inhmachhawn leh chauh dawn a ni. 

*Pep Guardiola-a'n manager a nih hnuah match 500 hnehna a chang ta, tun hmain Barcelona leh Bayern Munich a lo enkawl tawh.

*Man City a enkawl bikah match 273 a kaihruai tawh a, vawi 200 zet a chak. Hetiang zat hnehna chang tur hian EPL manager zinga hun mamawh tlem ber a ni.

*City hi tun hnaiah match 27 chhung an tlawm lo, heng zinga 24-ah hnehna an chang. 2017 April-December chhung khan match 28 tlawm loin an kaltuang, an record dinglai hi an nihrual teuh tawh hle.

*Dias-a'n City tana a goal hmasa ber a khung, season kal laiah City player zinga goal khung thei mi 19-na a ni chiah.

*Antonio-a'n tun season chhungin khualmual leh anmahni muala City an hmachhawn ṭumin goal a khung. Hammers player zingah Iain Dowie (1995-96) hnu lama hetiang ti leh thei hmasa ber a ni.