Bayern-in Cologne an sawp

Bundesliga-ah champion lai Bayern Munich-in Inrinni zan khan FC Cologne 5-1 in an sawp a, league hmahruaitu an ni chhunzawm zel. Inkhel dangah RB Leipzig-in Borussia Monchengladbach 3-2 in an hneh a, Bavarians hi point hnih chauhin an pha lo. Borussia Dortmund pawhin Arminia Bielefeld 3-0 inn an sawp a, season thara Champions League khelh beiseina a nung chhunzawm zel.

Bayern Munich-in Club World Cup an khelh zawhah Arminia Bielefeld nen 3-3 in an inhnehtawk a, Eintracht Frankfurt lakah 2-1 a an chak loh zui avangin insiamṭhat an mamawh hle. Champions League-ah Bayern-in an theihna an lantir a, Lazio 4-1 in an sawp. Bundesliga-ah pawh Europe-a an chet ṭhat chhunzawmin Allianz Arena-ah inkhel an thunun hle.

Hansi Flick-a hote tan hian Eric Maxim Choupo-Moting-a'n (18') goal hmahruai a khung hnuah Robert Lewandowski-a'n (33', 65') leh Serge Gnabry (82', 86') ten goal hnih ve ve an khung a, Cologne tan Ellyes Skhiri-a'n Bayern tlarhnung tihsual zarah minute 49-naah goal khat a khung ve bawk.

Bayern tan lawmna tur a tam hle. Leon Goretzka-a'n midfield a thunun a, vawi thum zet assist a rawn nei. Covid-19 vanga match hnuhnung palia khel thei lo Thomas Muller pawh second half-ah a inlan thei a, Serge Gnabry inhliam a dam tawh bawk avangin Bavarians goal nawr a na sawt bawk.

Nipui bazara Manchester United nen nasa taka sawi zawm Jadon Sancho pawhin a theihna a rawn lantir leh tawh a, Bundesliga-a vawi 99 a inlanna Mahmoud Dahoud  goal hmahruai khung tur a siam sak a, German top flight-a assist vawi 50 a neihna chiah a ni.

Kum 20 mi Sancho hian Marco Reus-a penalty hlawhchhuah chu minute 58-naah goal-ah a chantir a, Dortmund tan hian Real Madrid aṭanga loan hmanga an hawh Reinier Jesus-a'n minute 81-naah a khung leh bawk. Jesus-a goal khung hi Erling Braut Haaland-a siamsak a ni.