PSG chakna Mbappe goal hnih

Kylian Mbappe chuan Paris St-Germain tan innghahna tlak a nihzia a lantir chhunzawm. France international forward hian goal hnih khungin Paris club hi Dijon lakah 4-0 in hnehna a chanpui.

Inrinni zan French Ligue 1 inkhelah PSG lamin buaina an nei lo. Neymar awm lo mah se tlarhma lam an hriam tawk. Minute rukna lekah Moise Kean-a'n goal a khung ṭan a, forward Mbappe-a'n goal hnih a belh bakah Danilo chuan an goal thumna a khung bawk.

Mauricio Pochettino-a naute hian league match 27 an khelh aṭangin point 57 an hmu a, pahnihnaah an awm. Hmahruaitu Lille aiin point khatin an hniam zawk - nizan khan Lille an inlan a, an inkhel result a zirin an inthlauhna hi a la danglam leh thei ang.

PSG manager Poch chuan, "Tun ṭuma ka naute khelh dan chu duhthusam a ni, khatiang anga ṭha khan match zawng zawngah khel thei ila a duhawm hle. Kawng engkimah kan che vel a fuh a, goal kan khung hnem bakah keimahni lam kan inveng ṭha hle.

"Team nghet leh hlauhawm tak din kan tum mek a, chutiang tur chuan hmalam kan pan zel ang," a ti. PSG hian Nilaini zanah Bordeaux an lenchilh zui leh dawn, league nomawi an kawl lai chu hloh mai an tum lo hle.