Hliam vangin Nadal inhnukdawk

Rafael Nadal chu hnungzâng na vangin a inkhel thei rih dawn lo. Tun kar chhunga khelh tur Rotterdam Open-ah inlan tumin inziak lut mah se Spanish tlangval hi a inhnukdawk leh hnuhnawh a ni.

Australian Open inbuatsaih lai khan Nadal hi a hliam a, enkawl zui niin ATP Cup-ah inlan lo mah se Melbourne Park-ah a inkhel lui. Tun dinhmunah chuan zai a ngai hran lo a, ngaiawh tur erawh chuan chawlh a mamawh.

Rotterdam Open chuan thuchhuah siamin, "Vanduaithlak takin Rafael Nadal a inlan thei dawn lo, a inhnuhdawh chhan hi a hnungzâng na vang a ni," tiin world number 2 chungchang an sawi.

March 1-7 chhunga inelna neih turah Nadal a inlan theih dawn loh chuan Daniil Medvedev chu seeded pakhatna pek a ni ang. Russian tlangval hi tun dinhmunah world number 3 a ni a, champion tura rinkai a ni ang.

Tun kar chhung tho hian Qatar Open khelh a ni dawn, hmeichhe inelna huangah Ash Barty, Simona Halep, Bianca Andreescu bakah Iga Swiatek te chuan an inlan theih loh tur thu an tichiang tawh.