Champion thei zingah Barca an la tel

Ramon Sanchez Pizjuan-ah Lionel Messi thiamzia hmuh nawn a ni a, Inrinni zan khan Barcelona-in mualneitu Sevilla 2-0 in an hneh. Catalan club tan hian Ousmane Dembele-a'n first half-ah a khung a, second half-ah Messi-a'n chak nemnghehna goal a khung leh bawk.

Barcelona-in team ṭha zinga mi Sevilla an hneh avangin La Liga-ah point 53 an hmu a, pakhatna Atletico Madrid chu point hnih chauhin an pha lo. Chutihrualin Barca hi Atletico aiin match hnihin an khel tam a, nizan khan Diego Simeone hoten Villarreal an hmachhawn a, result kan hre hman lo.

Barca hian nikum October thla khan Sevilla hi Nou Camp-ah an mikhual a, 1-1 in an inhnehtawk. February 11 khan Ramon Sanchez Pizjuan-ah Copa del Rey semifinal first khel turin an lenglut a, Sevilla-in 2-0 in hnehna an chang.

Tun season vawi hnih an inkhelh tawhnaah Julen Lopetegui hote an chungnung zawk a, Ronald Koeman-a tan pawh Ramon Sanchez Pizjuan tlawh hi hna huphurhawm tak a ni. Dutch manager Koeman-a'n khelh dan hmang thlakin Antoine Griezmann-a bench-ah a dah a, tlarhmaah Griezmann aia che rang Dembele a dah. Messi erawhin ṭum dang ang thoin hmun pawimawh a chang.

Inkhel nung ṭha takah Messi through ball ṭha zet chu Dembele-a'n um lutin minute 29-naah goal hmahruai a khung a, goal pawimawh a ni. Barca tan Messi, Dembele leh Frenkie de Jong te hmangin Sevilla tlarhnung rum ṭhaih mah se goal dang hmuh tur a awm lo.

Second half-ah Sevilla an insiamrem a, goal hlauhawm pawh neiin Jesus Navas-a goal khung tur chu keeper Marc-Andre ter Stegen-a'n a dansak. Chutihrualin Messi telna Barca goal nawr a na chhunzawm hle.

Minute 69-naah Messi freekick chu Clement Lenglet-a'n tauh goal mah se offside vangin pawm a ni lo. Sevilla pawh an vanduai a, minute 80-naa Youssef En-Nesyri siphurh sutna pawh handball vangin pawm a ni bik lo.

A tawpah erawh Messi a langsar leh ta ber a, Argentine forward hian substitute Ilaix Moriba nen wall pass hmangin Sevilla tlarhnung an ṭhiat a. Messi goal khung tur hi Sevilla keeper Bono-a'n dang mah se a per chu minute 85-naah Barca captain hian goal-ah a chantir ta tho. 

Messi hian goal leh assist an nei ringawt lo a, a khelh dan thlengin sawi zui a hlawh. Sevilla midfielder Andujar Oliver-a'n Messi dan tuma a kut khing hnih a thawh chunga a man hman lo te chu an sawi zui nasa hle. 

Kum 33 mi Messi hi season ṭantirhah a chet ṭhat tawk loh avangin sawisel a hlawh a, tunah erawh inelna hrang hrangah goal 24 a khung leh der tawh. La Liga-ah pawh goal 19 khungin top scorer a ni mek a, amah hnaih bertu Luis Suarez aiin goal thumin a khung tam zawk.

Kum 2021 bikah phei chuan Messi hian inelna hrang hrangah goal 14 khungin assists vawi li a nei tawh a, Europe league sang panga zingah a record a ṭha ber.  Barcelona-in Messi an kawl miau avangin an chet ṭhat loh season-ah treble champion thei dinhmunah an ding. 

Chutihrualin Champions League last 16 first leg-ah PSG 4-1 in an hneh lo a, Copa del Rey semifinal first leg-ah Sevilla 2-0 an hneh loh bawk avangin hmabak erawh a ko hle.