Juve tan Ronaldo goal a tawk lo

Cristiano Ronaldo-a'n goal khung a bansan thei lo, a khung belh zel. Mahse Portuguese goal khat khungin Old Lady a chakpui zo lo a, an mikhualna ramah Hellas Verona nen 1-1 in an inhnehtawk.

Inrinni zan Serie A inkhelah chawlhlawk hmain goal a lut lo. Minute 49-naah Ronaldo chuan Federico Chiesa hnen aṭanga a ball hmuh chu goal hmahruai atan a khung, season kal laiah league goal 19 a khung tling leh der tawh.

Andrea Pirlo naute tan khualmuala point thum hmu turin mahni goal venhim a tawk. Amaherawhchu minute 77-naah an inveng thei lo, midfielder Antonin Barak chuan Darko Lazovic-a cross a tauh lut.

Lazovic hian hun tawp dawnah chakna goal khung theihna remchang a nei, mahse keeper Wojciech Szczesny chuan ṭha takin a lo dansak hram a, Italian champion hi point khata an lungawi a ṭul ta a ni.

Juventus hian hliam leh hri leng vangin Leonardo Bonucci, Giorgio Chiellini, Juan Cuadrado, Arthur, Paulo Dybala, Alvaro Morata leh Danilo te an chhawr thei lo vek a, an ṭhat dan berin an khel thei lo tih chu a chiang.

Bianconeri manager Pirlo chuan, "Inkhel harsa leh khirhkhan tak a ni a, harsa taka kan hmahruai tawhna kan venghim thei lo kha a pawi. Player chhawr theih loh kan ngah avangin tawnhriat nei tlem deuh an luh a ngai, a tawpah kan tuar ta a ni," tiin a sawi.

Inkhel dangah Lazio chu Bologna mualah 2-0 in an tlawm a, season tharah European football khelh an beiseina kawng chu a harsa tawh dawn.Tla hniam thei dinhmuna ding Parma chu Spezia nen 2-2 in an inhnehtawk bawk.