Highlander semifinal luhna Apuia goal ropui!

Lalengmawia - he hming hi chhinchhiah rawh, Indian football-ah a chanchin hi kan la sawi dawn chauh a, kan la hre dawn chauh. 

Zirtawpni zan khan Indian Super League inkhelah NorthEast United chuan 2-0 in Kerala Blasters an hneh a, semifinal lut tura draw chauh mamawh Highlander-in point thum nen a thiam pali zingah an hming an nem kai. 

Highlander tan Lalengmawia (Apuia) chuan goal ropui leh mawi bik a khung a, player naran tana khung chi a ni lo - Apuia hma hian VP Suhair chuan goal khat a khung bawk a, Blasters lamin a chhanletna tur an nei lo. 

Kerala club tan K. Lalṭhathanga chu minute 59-naah bench aṭanga luhtir a ni a, Bethlehem Vengthlang tlangval hian danglamna erawh a keng tel lo - Blasters hian league table-a 10-na ni chungin season an khar. 

Kum 20 leh ni 45 mi ni chunga ISL captain naupang ber record lo siam tawh Apuia chuan semifinal an luh theih nan Khalid Jamil pawimawh thu Vanglaini a hrilh a, Mumbai coach a dah sang hle. 

Vaivakawn tlangval chuan, "Khalid-a hnuaiah hi chuan player zawng zawng hi a game plan-ah kan tel vek a, kan duh ang taka khel turin zalenna min pe bawk. 

"Tlarhnung ven pui leh goal nawr kawng thlengin zalenna min pe a, nuam ti takin attacking game kan khel bawk a ni," a ti a, Khalid-a'n Highlander-ah danglamna a thlen thu a sawi. 

Blasters laka hero of the match-a thlan Apuia chuan ama khelh dan bikah erawh a la duhtawk lo cheu! India Under-17 international hlui chuan, "Ka khelh danah ka lawm a, mahse, hei aia ṭha zawk ka la duh. Assist takngial pawh ka la nei lo a, goal pawh khung belh ka la duh," a ti!

FIFA Under-17 World Cup 2017-ah Apuia hi Mizo awmchhun a ni a, a inkhel tam lo - tunah erawh he squad pumpuia player zingah Apuia aia sawi hlawh leh hming chher zawk an awm lo. 

Apuia chuan, "Ka damlo bawk nen World Cup-ah khan khelhna hmun ka chang tam lo. Mahse, ka beidawng ngai lo a, theihtawp ka chhuah chhunzawm reng. Pathian kutah ka innghat tawp a, anin a hunah tak min khelhtir ni berin ka hria," a ti. 

Tun season ISL-a hero of the match-a vawi li thlan tawh Apuia chuan semifinal thlir lawkin, "A harsa dawn tih ka hria a, mahse, kan theihtawp kan chhuah ang a, a bak chu Pathian kutah ka dah a ni," a ti a, a hahdam thiam hle. 

Blasters laka a goal ropui chungchang sawi zuiin, "Ka goal hmasa ber a nih avangin ka lawm takzet a, Pathian hnenah lawmthu ka sawi tawp mai a ni," a ti - Apuia hi February ISL Emerging Player of the Month-ah thlan a ni.