Vanglaini Biangbiakna Ka player-te thawhrimna vang a ni - Khalid Jamil

NorthEast United coach Khalid Jamil-a'n a zia a la thlak lo - Indian Super League match kuaah a tlawm loh avangin football fans leh media-te fak rawn a hlawh a, ani erawhin a player-te vanga tun dinhmun thleng a nih thu Vanglaini a hrilh. 

I League vanglaia thilmak thlentir a, Aizawl FC lo champion pui tawhtu coach hian Mizo club-a enkawl lai pawh khan an chakin, "Ka player-te vang a ni," a ti a, an tlawmin, "Keimah vang a ni," a ti ṭhin thung. 

ISL semifinal khel tura NorthEast United an tlin hnu lawkah Vanglaini chuan Khalid Jamil a be pawp nghal a, Mumbai tlangval hian a hlawhtlinna thuruk leh hmachhawpte Vanglaini hnenah a sawi chhuak. 

Khalid hi season ṭantir khan NE United-ah assistant coach a ni a, mahse, match khat hnu lawkah ISL khelhna Goa-a chhuahsan. Media ṭhenkhat chuan hetihlaia coach Gerard Nus nen an inhmuh thiam loh vang niin an sawi a, mahse, Khalid chuan, "Club thutlukna a ni a, Nus nen ka buai lo," a ti.

Khalid-a'n NorthEast enkawl hna a thawh dawn khan league match sarih chhung zet chu a zawnin an chak zo tawh lo a, an dinhmun a ṭha lo hle - Nus an ban a, rin loh takin season ṭantir lama an haw 'tir' Khalid-a lam an hawi. 

Mumbai FC aṭanga bul ṭantu coach hian league round an khelh zawh meuh chuan Highlander hi match kuaah a kaihruai a, tlawm a nei miah lo - vawi ruk an chak a, vawi thum an khingpui an inhnehtawkpui. 

East Bengal leh Mohun Bagan pawh lo enkawl tawh coach hoa Highlander-in an hneh zingah hian ISL 'top team' ATK Mohun Bagan leh Mumbai City an awm bawk a, vanneih vang ngawt chu a ni lo. 

Khalid chuan, "Hlawhtlinna thuruk ka neih chu ka player-te an ni. Theihtawp an chhuah a, an theihna zawng zawng an hlan a, chu vang chuan tun dinhmun hi kan thleng a ni," a ti. 

Khalid-a'n Highlander a enkawl ṭantirh kha player-te hnual lai tak a ni a, khatihlaia an dinhmun aṭang chuan playoff chu cho rual a ni lo.

Mumbai tlangval chuan, "Ka player-te chu theihtawp chhuah turin ka ngen a, 'In theihna zawng zawng pe ula, hlauthawng loin khel rawh u - chu chuan in theihna tak tak a pho chhuak ang. Engkim hi a ṭha leh vek ang tih ring ngam rawh u,' tiin ka hrilh a ni," a ti. 

Mumbai FC-in an ban ṭuma rilru hahna hneh a, I League-a ropui taka Aizawl FC champion puitu coach hian inelnaa hlawhtling tura rilru paukhauh pawimawhzia chu a hai lo. 

Player-ten point 27 hlawhchhuah tur la awm aṭanga point 21 hlawh chhuakin an coach an chhanglet a, match kuaah goal 18 ngawt khungin an lamah goal 10 chiah a lut thung. 

Khalid-a record a chhuanawm a, ISL champion hial ni tura duhsaktu tam tak an awm - hetiang karah hian Khalid-a hma hun tur inrinsiakna a tam hle. 

Kum 43 mi coach chuan, "Ka hma hun tur ngaihtuah hun a la ni lo. Semifinal-ah chiah ka rilru ka pe a, tunah chuan hnehna changa final luh hi kan tana pawimawh ber chu a ni," a ti. 

Khalid chuan hmarchhak player enkawl nuam a tih thu sawi zuiin, "Hmarchhak player-te hi chu an thawkrim bik ṭhin a, enkawl an hahdam em em zel," a ti a, "Player thawkrim lo an awm lo. Chuvang chuan ka hlim a, a pawimawh ber chu ka player-te pawh an hlim hi a ni," tiin a sawi zui. 

Indian coach zinga ISL semifinal-a a team hruai thleng hmasa bertu coach chuan, "India coach dang pawhin ka tih ang hi chu an tithei - rim takin thawk phawt rawh se," a ti!

Apuia: India rama midfielder ṭha ber pawl a ni a, hmabak a nei êng hle. A la naupang a, tlarhnung ven leh goal nawrpui thlengin a thiam em em vek a, hma a sawn zel ang. 

Rempuia: Player tawnhriat nei ṭha tak a ni a, NorthEast-ah ringawt pawh kum li a awm tawh. Hyderabad laka kan game-ah khan a khel ṭha takzet a, ani pawh player ṭha tak a ni. 

Chhara: Season bul a ṭan ṭha a, kerek hliam vangin match hnuhnung pahnih a khel thei lo hlauh a ni. A dam ṭha a nih phawt chuan ka team-ah a tel zel. 

Mapuia: Highlander coach hna ka chelh ṭan khan hliam vangin a talbuai a, a inlan thei lo. India rama striker ṭha pawl a ni a, tunah chuan a dam tawh avangin ka chhawr thei tawh ang.