Liverpool vs Bayern: Anfield-ah a goal lo

Thawhlehni zan Champions League last 16 inkhelah goal a lut lo a, Liverpool chuan an mikhual Bayern Munich 0-0 in an inhnehtawkpui. 

Bayern khelh dan aṭangin German club hi draw result-ah an lawm tawk tih a hriat a, mahni muala goal khung lo Liverpool-in goal an chhuah loh avangin an lunghnur lutuk lo ang. 

Anfield-a inkhelah Liverpool-in inkhel an thunun zawk a, result aṭang ngawta teh chuan inkhel hmuhnawm loh hmel tak a ni a, Reds chance hlah zozai aṭanga thlir erawh chuan inkhel hmuhnawm tak a ni thung. 

Liverpool boss Jurgen Klopp chuan, "Kan duhthusam result chu a ni lo chiang a, mahse han hnualna em em tur a awm chuang lo," tiin a sawi a, hei hian Reds dinhmun chiang takin a hrilhfiah. 

Liverpool-in attacking football an khel a, mahse goal erawh an zawng hmu thei tlat lo.  Sadio Mane-a'n vawi tam chance a hlah a, a bik takin ven loha a awm chunga a tauh lut lo leh minute 85-naah a tauh goal loh te chu uiawm zual an ni. 

Mohamed Salah-a'n Jordan Henderson ball ṭha zet hmanga a chance neih chu a pet goal thei lo a, tauh goal-na remchang tak a neihah a tauh lut thei lo a, inkhel pumpui thlirin Salah tan chuan theihnghilh daih tlak inkhel a ni - a match hnuhnung pali-ah vawi khat chiah goal a khung. 

Ṭum dang ang bawkin Roberto Firmino a hmuhnawm a, Brazilian forward hi player class tak a nihzia hmuh turin a awm leh ṭhin - Joel Matip tana a ball siam ṭha zet Matip-a'n a khung thei lo erawh a ui vawng vawng ang.

Reds tan captain Jordan Henderson a khel ṭha tluan chhuak zak a, first half-a Salah tana a ball siamsak te chu midfielder ball pet thiam bik ke chhuak a ni.

Liverpool buaina lian tak chu Barcelona laka Philippe Coutinho an chan hnuah Brazilian midfielder hmun ruak luah zo tu an la nei lo niin a lang a, Reds fan-ten Coutinho an ngai vawng vawng ang. 

Bayern tlarhnung an inremphui ṭhat avangin penalty box chhungah Reds player-te an talbuai fo a, khatiang huna an mamawh ṭhin chu box pawn aṭanga goal khung thei leh thiam bik Coutinho a ni. 

Liverpool midfield enin Coutinho hmunruak luah thei ber tura ngaih chu Alex Oxlade-Chamberlain a ni a, Arsenal midfielder hlui hi hliam vangin a la chawl mek. 

Kum 25 mi Ox hian Liverpool training a zawm tawh a, March 13 zana second leg an khelh hunah a inlan thei a nih phawt chuan Reds fans tan a lawmawm khawp ang. 

Jupp Heynckes leh Pep Guardiola enkawl ṭhin Bayern Munich tan chuan Anfield-a draw result hlawhchhuah hi hlawhtlinna a ni lo mai thei a, Niko Kovac enkawl Bayern tan erawh hlawhtlinna a ni. 

German champion hian 4-2-3-1 formation hmangin goal chhuah loh chu thupui berah an nei a, Reds tlarhnunga phuahchawp taka Matip leh Fabinho te ding dun tan harsatna an thlen meuh lo. 

Tun season-a goal 25 khung tawh Robert Lewandowski chuan minute 90 chhungin vawi 34 chiah ball a tawk fuh a, Anfield-a inkhel bul ṭan zingah ball khawih tlem ber niin Liverpool penalty area-ah vawi thum chiah ball a tawk fuh. 

Bayern hian Liverpool target-ah shot an nei miah lo a, May 2015-a semifinal first leg-a Barcelona an hmachhawn ṭuma target-a shot an neih miah loh hnua Champions League match-a target-a shot an neih loh hmasa ber a ni - defensive game an khelh miau loh avangin a awm lo hran lo. 

German champion-in Anfield-ah 'draw' game an khel a, tun hmaa Bayern ang kha an ni tawh lo tih chu inkhel entuten an hria ang - Manuel Neuer, Javi Martinez, Joshua Kimmich leh David Alaba te ho la awm mah se tun hma ang kha chu an ni lo. 

Tlarhmaah an vanglai hun hmang Arjen Robben leh Franck Ribery te chhawr tur nei ṭhin khan striker class sang Lewy thlawp tura an neih chu player vantlang Kingsley Coman leh Serge Gnabry te an ni. 

Manuel Neuer hi khawvela goalkeeper ṭha ber pawl la ni reng mah se a vanglai ang kha chu a ni tawh lo tih tun hnaia a inkhelh dan aṭangin a lang a, midfield-ah Xabi Alonso anga 'thiam' hi an la nei leh rih chiah lo niin a lang bawk. 

Tlarhmaah a inchhawka Mario Mandžukic leh Mario Gomez chhawr thei ṭhin khan Lewy khelh ṭhat lo pawhin a thlak zo tur an nei rih lo a, hrem vanga Liverpool hmachhawn thei lo Thomas Müller lahin a career-a a season chhe ber anga chhal theih a hmang mek a, tun season Bayern hi tun hnai kum 10 chhunga an chhiat ber ṭum a ni hial mai thei. 

Liverpool-in mahni mualah goal an khung lo a, goal an chhuah lo bawk. Hei vang tak hian Liverpool hian chance an nei tha anga chhal theih a ni a, 1-1 a an inhneh tawk a nih pawhin away goal rule hmangin an tlang daih thei ang.

Mahse, Bayern record lam en erawh chuan Reds fans tan hahdam taka awmna chi niin a lang lo- Bayern hian Champions League home match 26 an khelhah vawi hnih chauh an la tlawm a, Allianz Arena an hmang thiam hle.

Hetih rual hian tun season-a Liverpool Champions League 'form' hi thlirlet loh a harsa. Tun season Champions League bikah khualmualah an inkhelhah an tlawm vek!

Napoli chu 1-0 in ngam lo a, Paris St-Germain lakah 2-1 in an tlawm a, hnehna an chan ngeina tur hmuna an ngaih Red Star Belgrade lakah pawh 2-0 in an la tlawm cheu.

Hetihlai hian Liverpool tan hian Virgil van Dijk a kir thei tawh dawn a, Muller chhawr thei lo a Bayern-in Joshua Kimmich an chhawr thei dawn lo bawk- kum 24 mi defender hian tun inelnaa a yellow card pathumna a hmu a, Allianz Arena-ah a inlan theih dawn lo.

Liverpool hian Pathianni zan Premier League-ah Manchester United an lenchilh zui ang.

Inkhel banah Liverpool boss Jurgen Klopp leh Bayern head coach Niko Kovac te chuan an ṭhat dan berin an khelh loh thu an sawi ve ve.

Reds boss Klopp chuan, " Kan hun ṭha neih pawh passing game fuh tawk loh avangin kan khawhral zel a, kha aia ṭha zawka khel thei kan ni," a ti.

Klopp chuan sawi zawmin," First half-ah khan chance duhawm tak tak kan nei a, mahse second half-ah erawh kan pahnihin chance mumal kan nei lo ve ve. Chuta ṭanga thlir chuan Champions League zan a ni lo ang mai a ni," a ti a, a duh ang result a hmu lo.

Liverpool hian an defeder pahnih Virgil van Dijk (hrem) leh Dejan Lovren (inhliam) te an chhawr thei lo ve ve a, laiah Matip leh Fabinho inkawp a ngaih phah.

Klopp chuan," VVD tel lo in goal kan chhuah lo a, hei hi mi tam takin an beisei loh a ni. Kan defending a ṭha a, ṭha zawnga lakchhuah theih tam tak a awm. Draw reult ro roah result duhawm a ni a, mahse kha aia ṭha zawka khel thei chu kan ni chiang a ni," tiin a sawi.

Bayern Munich head coah Kovac chuan," Anfield-ah hian 80% ball possession chu kan chan kan ring hauh lo a, amaherawhchu kan goal nawr danah kha chuan kha aia ṭha zawka khel thei kan ni. Inelna sang chinah chuan an inthlauhna hi a zim takzet a, second leg-ah chumi dikna chu hmuhin a awm ang. Goal awm loa kan inhnehtawkah hian lawmna tur a awm lo a, kan result avang hian second leg atan ṭha zawka inpuahchah a ṭul dawn a ni," tiin a sawi.