Police chak chiang, Aizawl FC inhnukdawk

Lalbiakliana Memorial MFA Super Cup 2019-ah Mizoram Police-in quarterfinal lut turin MPL club Chawnpui FC chu 6-1 in an hneh a, I League club Aizawl FC erawh inelna hmachhawn tura an la inpeih tawk loa ngaiin an inhnukdawk.

Vawiin hian Round of 16 khelh zawh a ni dawn a, match li khelh turah MPL club pakhat chauh awm mah se inlan tur hi Lalsangzuala Hmar enkawl Electric Veng FC an nih avangin Lammual panna tham a tling ang. MFA Super Cup-ah hian Chanmari leh Mizoram Police ten quarterfinal an lut tawh a, Chawnpui FC tla tawhin Aizawl FC an inhnukdawk a. Club pathum Chhinga Veng FC, Ramhlun North leh MPL kaithar FC Venghnuai ten inelna an hmachhawn lo.

Hmunṭha club J&C FC chu Lengpui FC tan an ṭha hret a, 4-1 in hnehna an chang. J&C FC tan hian Hmingchungnunga'n hattrick a siam bakah Lalengtluanga'n goal khat a khung a, Lengpui FC tana Lalnunpuia khung chu hmingchhe lutuk tur thupna chauh a ni.

J&C FC hi Lengpui FC lakah ṭha mah se quarterfinal-ah Electric Veng FC an hmachhawn thei a, MPL club laka result ṭha nei tur chuan ṭha zawka an khelh ngei a ṭul ang.

Tualchhung football club zinga kalphung mumal bera ngaih Aizawl FC chuan  Nilaini khan MFA hnenah ziakin an inpeih loh thu an thlen. MPL champion lai Aizawl FC hi season tharah Stanley Rozario-a'n a enkawl chhunzawm dawn a, July 15 aṭang khan coach hnuaiah training an ṭan tawh.

Amaherawhchu tarlan tawh angin kumin Aizawl FC squad-ah hian player an naupang rual a, inpeih hmaa team ṭha leh inelna hmachhawn an duh lo niin a lang. AFC technical director Hmingthansanga chuan, "Coach ten thutlukna an siam a, MFA Super Cup-ah kan inlan ta lo," tiin Vanglaini a hrilh.

MPL club pahnih Mizoram Police FC leh Chawnpui FC te an inkhel tawk a, match hnih khelhna Chawnpuiin Jonathan Lalhriatkima hmangin minute 19-naah goal an khung hmasa zawk.

Amaherawhchu Chawnpui player Vanlalthlamuana chuan Police goal khung tur a kutin a dang a, hnawhchhuah a ni bawk. Police midfielder Lalramtharmawia'n minute 24-naah penalty aṭangin an siphurh a sut a, Lalbiaksanga Colney hoten inkhel an thunun zui bawk.

Police goal khung khawl Lalbiakhlua'n (Biaktea) goal li zet khung belhin Lalfakzuala'n goal khat a khung ve bawk. Aizawl FC an inhnuhdawh avangin Mizoram Police hian team nem zawk tura ngaih Kolasib club Youngstar FC an hmachhawn phah ang.

Chawhma dar 9:00-ah MPL aṭanga tla hlim Bethlehem Vengthlang FC-in LKS Hnahlan FC an hmachhawn dawn a, dar 11:00-ah ITI Veng club Youngstar United FC-in club hlun Dinthar FC an khelhpui dawn.

Tlai dar 1:00-ah Electric Veng FC an inlan dawn a, anni hi Mizo coach ṭha Lalsangzuala Hmar-in a enkawl avangin ngaihven an hlawh thar hle. Electric Vengin coach Sanga hnuaia fiahna hmasa ber chu Darlung GSA lakah an hmachhawn ang.

Mission Veng FC leh Kanan FC ten harsatna nei loin Thenzawl Dinthar leh Sangtei FC te an hneh a, Aizawl DFA hnuaia team pahnih hi vawiin tlai dar 3:00 hian an inkhel dawn.