Ozil leh Kolasinac ten beih an tawk

Arsenal playmaker Mesut Ozil leh defender Sead Kolasinac te chu Ningani zan khan London khawlaiah misualin an bei a, mahse player pahnih hian hliam an tuar lo niin club lam chuan thuchhuah an siam.

Video aṭanga a lan dan chuan Platts Lane, Golders Green-ah player pahnih hi kawngah motor-in an tlan lai chu misual pahnih hriamhrei kengin an tibuai, Bosnia tlangval Kolasinac chu rawn chhuakin misual hi a bei let a, rei vak lo an insual hnuah misual hi an tlan chhia.

Arsenal chuan thuchhuah siamin, "Kan player pahnih hi kan be pawp tawh a, an dinhmun a ṭha e," tiin na leh hliam an neih loh thu an sawi. He thu buatsaih lai thleng hian misualte hi man an la ni lo. London khawlaiah hian Kolasinac leh Ozil te chauh hi footballer beih tawk an ni lo, kum 2016 khan khatihlaia West Ham striker Andy Carroll pawh beih a lo ni tawh, a beitu man chhuah niin kum ruk chhung jail tang tura hrem a ni.