Wolves-in Europe an thlir

Europa League second quali­fying round first leg-ah Wol­verhampton Wanderers-in hnehna an chang nghal a, an mi­khual Crusaders chu 2-0 in an hneh. 

Premier League club tan Diogo Jota chuan minute 37-na lekah goal hmahruai a khung a, Ruben Vinagre chuan hun pek belh minute thumnaah chak nemnghehna goal a khung. Steven Gerrard enkawl Ran­gers pawhin hnehna an chang ve zel a, an mikhual Progres Niederkorn chu 2-0 in an hneh. 

Rangers tan Joe Aribo leh Liverpool aṭanga loan-a an hawh Sheyi Ojo te chuan goal khat ve ve an khung a, Progres-in a chhanletna tur an nei lo. 

Northern Irish club lakah Wolves-in inkhel ṭantir aṭangin game an thunun nghal a, hun a tawp meuh chuan 80% ball an chang a, shot vawi 30 zet an nei!

Hetihlai hian Crusaders-in vawi khat bak shot an nei thei lo a, target-ah a la ni lo zui - first round aṭanga inlan ṭan team tan third round luh beiseina a tlem ta hle. Wolves-in Jota hmangin hma takah goal khung mah se goal dang erawh an khung lawk thei lo a, hun pek belha Ruben Vinagre goal lut lo se result-in 'inkhel' a hrilhfiah zo kher lo ang. 

Second leg khelh leh tur a ni dawn a, Wolves hi an tlang a nih chuan Czech club FK Jablonec emaw Armenian club Pyunik an hmachhawn ang. 

Wolves boss Nuno Espirito Santo chuan, "Season kan ṭan hma a, a harsa a ni. Kan inpeih tawh tih kan pholang a, mahse kan nih tur angin kan khel chhuak lo. 

"Goal hnihna kan khung khan danglamna a siam hlauh zawk a, nun khawchhuahna tura bei club kan hmachhawn avangin kan tan chuan a harsa em em a ni," a ti. Wolves hian second round hnuah third round leh playoff an la hmachhawn leh a ngai dawn a, kum 39 hnua European football khelh leh an tumna kawnga an zinkawng a awlsam dawn lo. 

Premier League club hian nipui transfer-ah player lak­luh an la nei lo a, season hma­saa loan hmanga an hawh Raul Jimenez leh Leander Dendoncker te a nghetin an lalut thung. 

Steven Gerrard-a'n Europa League-a a team hruai thlen ngei a duh a, first round-ah 10-0 ngawta Gibraltar club St Joseph's an sawp hnuin second round-ah an chak leh ta. 

Rangers hian an mikhual Progres Niederkorn laka hnehna chang turin harsatna an tawk lo. Joe Aribo chuan minute 20-naah goal hmahruai a khung a, minute 54-naah Ojo chuan a thawhbelh ve leh bawk. Luxembourg club Progres hi minute 88  hnu lamah phei chuan kim loin an khel a, defender Tom Laterza chu a yellow card pahnihna a hmuh avangin hnawhchhuah a ni. 

Rangers coach Gerrard chuan, "Kha aia goal tam zawk kan khung lo kha pawi ka ti. Zaninah khan engkim chinfel ka duh a, goal hmaah kan hriam tawk lo a ni," tiin a sawi.