Hamilton-a'n Vettel a ringtawk

Pathianni zan dar 6:40 hian Formula 1 2019 German Grand Prix tlan a ni dawn a, driver championship hmahruaitu Lewis Hamilton chuan khawtual tlangval Sebastian Vettel chu chak tura rinkai a nih thu a sawi.

World champion vawi li ni tawh Vettel-a'n season a hmang fuh thei rih lo, tihsual a nei ngun hle. British Grand Prix an tlan zawh takah pawh khan Red Bull driver Max Verstappen nen an intipalh. Mercedes driver Hamilton chuan, "Mi tam zawk chuan a sulhnu an theihnghilh hman a ni mai thei, kei chuan world champion vawi li a nih tawhna leh elpui hautak chungchuang a nihzia ka la hre chiang. Engtik niah emaw chuan ṭha zawkin a rawn kir ang tih ka chiang," a ti.

Britain tlangval Hamilton hian tun hnai season hnih chhung bik chu world championship-ah Vettel hi a hneh. German tlangval hian ṭha takin bul ṭan ṭhin mah se kum tawp lamah a hniam zawkah a ṭang leh ṭhin, kuminah erawh an bulṭan dan a letling ta thung.

Nikum June thla hnuah Vettel hian tihsual lian vawi riat ngawt a nei tawh a, season hmasa khan an rama inelna an neih ṭum pawh hian hnehna chang tura ngaih a nih hnuah ruah surin a tibuai a, harsatna tawkin a chesual - tun kar tawpa inelna an neih tur hi a tan fiahna a ni dawn.