Cricket Association of Mizoram -in BCCI aṭangin vaibelchhe 10.8 an dawng

Cricket Association of Mizoram chuan nimin khan Aijal Club-ah Special General Body Meeting an nei a, India rama cricket thuneitu sang ber Board of Control for Cricket in India (BCCI) aṭanga vaibelchhe 10.8 an dawn thu 

an puang.

September 12 hian CAM hruaitu inthlanna neih a ni dawn a, BCCI hnuaiah hian politician leh sorkar hnathawk tan hruaitu a nih theih loh avangin CAM president nilai Lal Thanhawla'n a nihna a chelh zui thei dawn lo. 

Mizorama cricket thuneitu sang ber Cricket Association of Mizoram (CAM) hi kum 1992 khan din a ni a, cricket khelh ṭan hun tak erawh 70s chho kha a ni. Hetih hunlai hian club-in cricket kal dan hi a buaipui ṭhin.

State pawn aṭanga sorkar hnathawka awmten Lammualah Pathianniah an khel ṭhin a; Vijaya Bank, CRPF leh Assam Rifles ten team an nei a, hemi hnu hian club hrang hrang a ding chho. 80s chhoah pawh hian Association mumal la awm lo mah se Mizoram hmingin state ṭhenawmahte team an tir tawh.

January 1992 khan Sports Department leh Cricket Club inhmu khawmin Mizoram Cricket Association an din. Hemi kum vek hian tuna honorary general secretary nilai Mamon Majumdar rawtna angin Cricket Association of Mizoramah thlak a ni.

CAM president hmasa ber chu hetihlaia Sports & Youth Affairs Department director Joe Lalhmingliana a ni a, association dintirh hian club pali chauh a awm. Tunah erawh CAM hnuaiah club 30 inziaklut tawhin first, second leh third division-ah an ṭhen hrang a, inelna mumal takin an kalpui.

Kum 1992 daih tawh khan CAM hian BCCI hnenah an hnuaia tel an dil tawh a, Mizoram chief minister hlui Lal Thanhawla'n BCCI hruaitu liante biain nasa takin hma a la. A tirah thu lawmawm hriat tur erawh a awm mai lo.

August 9, 2018 khan Supreme Court chuan thuchhuah siamin BCCI hnenah team pakua chu domestic cricket calendar-a tel turin a hriattir a, chung zingah chuan Hmarchhak state paruk Mizoram, Arunachal Pradesh, Manipur, Meghalaya, Nagaland leh Sikkim te an tel.

BCCI-in CAM a pawm takah chuan nikum September thla khan Mizoram team chuan over 50 hmanga state hrang hrang inelna Vijay Hazare Trophy an hmachhawn. First class cricket an khelh hmasak berah hian Mizoram hi Plate Group-ah awmin September 26-ah Sikkim chu 46 runs in an hneh a, Mizoram cricket chanchina chhinchhiahtlak a ni.

Mizoram hian nikum November leh kumin January chhung khan ramchhung inelna ngaihhlut Ranji Trophy chu a vawi khat nan an khel leh bawk.

Season khelh zawh takah khan Mizoram senior team-in inelna Vijay Hazare Trophy (One Day), Ranji Trophy - League (Multi Day) leh Syed Mushtaq Ali Trophy (T20) te an khel a. Match khat zelah player pakhatin Ranji Trophy-ah Rs 1,40,000 an dawng a, Vizaj Hazare Trophy-ah  Rs 40,000 leh Syed Mushtaq Ali-ah Rs 25,000 an dawng bawk.

Nikum bikah khan Mizo player zinga match khel tam hian nuai 20 bawr vel an dawng pha. Season tharah inelna pathum an khelh sa bakah hian inelna pali Duleep Trophy (Multi Day), Prof. Deodhar Trophy (One Day), Ranji Trophy - K.O. (Multi Day) leh Irani Trophy (Multi Day) a awm belh dawn. Inelna a tam hian player sum lakluh a tam phah dawn tihna a ni.

Cricket Association of Mizoram hian an sum hmuh vaibelchhe 10.8 hi Mizoram aiawha kal senior, junior leh hmeichhe team a kalte hnenah a sem ang. CAM hruaituten an sum hmuh hi cricket hmasawn nan an hman tur thu an sawi a, an hman dan tur tak erawh la rel ṭhat tur a ni.