FIFA-in AIFF insawifiah turin a ti

Football khawvela thuneitu sang ber FIFA chuan All India Football Federation (AIFF) hnenah lehkha an thawn a, tun hnaia Indian football-a thil thleng chungchangah insawifiah turin a ti. 

AIFF-in India rama league sang ber ni tura Indian Super League a ruahman chungchangah I League club lungawi lo paruk East Bengal, Mohun Bagan, Minerva Punjab, Churchill Brothers, Aizawl FC leh Gokulam Kerala chuan FIFA president Gianni Infantino hnenah lehkha an thawn. 

He lehkha avang hian FIFA chief member associations officer Joyce Cook chuan AIFF general secretary Kushal Das hnenah lehkha a rawn thawn a, "FIFA chuan AIFF dinna a hre duh a ni," a ti. Joyce Cook chuan, "Media report hrang hrang aṭangin tun hnaia I League club nena in indawrna, India rama top league kalpui tura in ruahmanna te kan lo hria a, I League club ṭhenkhatin min rawn be bawk. 

"Buaina zingah hian FIFA leh AFC te nen thawkho a, 2018-a ruahmanna kan lo siam tawh tam tak kha a tel niin kan lo hria a, hemi chungchangah hian FIFA chuan AIFF dinna a hre duh a, hriat belh tur dang a awm a nih chuan sawi turin kan ngen bawk che u a ni," a ti. 

Nimin khan AIFF chuan thuchhuah a siam nghal a, "ISL-ah relegation hi kumkhuain a awm lo reng dawn lo a, Indian football hmasawn nan ruahmanna siam zel a nih tur thu AIFF president Praful Patel ngei pawhin vawi tam a sawi tawh a ni. 

"India rama league pakhat neih chungchang pawh Praful Patel leh I League club-te pawhin an sawi ho tawh a, mahse kum hnih thum tal chu engkim tifel tur chuan a ngai a ni, tih chu thil hriat sa a ni," an ti a, I League club-te chet danah an lawm lo niin a lang.