Test aṭangin Mohammad Amir a chawl

Pakistan fast bowler Mohammad Amir chuan test cricket a chawlhsan thu nimin khan a puang a, one day international leh twenty20-ah erawh a inlan chhunzawm zel dawn. 

Kum 27 mi Amir chuan, "Pakistan tan a sang ber thleng khela traditional format (test)-a ka inlan thei hi ka inchhuang takzet a ni. Mahse, tunah chuan hun mamawh rei zawk test chawlhsan a, white-ball cricket (ODI & T20) lama inthlurbing ka duh a ni," a ti. 

Amir hian kum 17 mi lek niin 2009 khan a test match hmasa ber a khel a, test match 36-a inlanah wicket 119 ngawt a la. Mahse, 2011 khan spot fixing vangin kum nga chhung atan hrem a ni a, 2016 khan a rawn kir. PCB managing director Wasim Khan chuan, "Amir hian kum naupangte nichungin harsatna a paltlang a, cricketer ropui tak ni turin a lo kir leh a ni. Test-a ram tana a hnathawh kan hria a, kan ngai dawn hle. Mahse, a thutlukna kan zahsak a ṭul a ni," a ti. 

Pakistan cricket team-a a kir hnu rei loteah hlawhtlinna a chhar nghal a, 2017 ICC Champions Trophy-ah nomawi chawipuiin player pawimawh a ni. ODI bikah ram tan match 59 khelin wicket 77 a la tawh a, T20-ah match 42 khelin wicket 55 a la thung. Amir chuan, "Nakkum ICC Men’s T20 World Cup atan a ṭha thei ang bera khel turin ka inbuatsaih dawn a ni," tiin a sawi.