Chelsea vs United: Goal lut loin an ṭin

Manchester United an phur rei hleithei lo - Pathianni zan khan Chelsea chu khualmualah 0-0 in an inhnehtawkpui a, Premier League champion an beiseina chu a thamral ṭan leh mek. 

Red Devils hian hnehna an chan zawh loh avangin hmahruaitu Manchester City chu khelh zat inangah point 12 laiin an phak tawh lo a, champion tur chuan thilmak a thlen tel tawh a ngai ang. 

Chelsea-in hnehna an chan zawh loh avangin top four-a inhlankai an tumna chu tlawlh rih bawk a, pangana dinhmun luah mekin an chunga awm West Ham chu point khatin an la phak lo. 

United hian Nilaini zanah league match khel turin Crystal Palace an lenchilh zui dawn a, Chelsea hian Ningani zanah Liverpool an lenchilh thung dawn - a awlsam lo ang.

Tawnhriat nei ṭha Thomas Tuchel-a'n Chelsea coach hna chelh tura Frank Lampard-a thlak hnuah Blues-in inelna hrang hrangah match kua an khel ta a, tlawm an la nei miah lo. 

German coach hian London club-ah danglamna nasa tak a thlen tih chu hai rual a ni lo a, a game plan-ah player-te an tel vek avangin team chhungah inelna boruak ṭha zawk a siam tih a lang bawk. 

Hetihrual hian United lakah erawh tlarhma an hlauhawm tawk lo a, inhnehtawk vanga lawm tur an awm a nih chuan Stamford Bridge-a inkhelah Chelsea hi a lawm tur zawk an ni. 

Chiang taka lang erawh Lampard-a Chelsea an talbuai a, Tuchel-a Chelsea erawhin inrintawkna an nei let a, team tawh khirh tak an ni leh ta. 

Manchester United-in Callum Hudson-Odoi handball vangin penalty an hmu ngei turah an ngai a, mahse, referee Stuart Attwell-a'n video assistant referee a rawn chungin penalty pekna turah a ngai lo. 

Red Devils tan Scott McTominay chuan hun duhawm tak nei mah se Edouard Mendy chuan ṭha zetin a dansak a, Fred chuan a hun ṭha neih a chhawr ṭangkai thei bik lo bawk. 

United keeper David de Gea-a'n Chelsea forward Hakim Ziyech-a shot ṭha zetin a dang tih loh chu Blues-in chance duhawm tia sawi tur an nei meuh lo thung a, inkhel pumpui thlirin

United chu chak phu zawk an ni. 

Hetihrual hian United hi uang hmel pua intithei tur an ni tihna erawh a ni lo - league match 20 zet chu khualmualah tlawm tawh lo mah se hun pawimawhah eng ruai an ang ṭhin lo a, City nen meuha inel tur chuan an player-te rilru hian a la phak lo niin a lang. 

Chance kan nei ṭha zawk a, second half-ah khan kan nawr tawm viau bawk. Mahse, a tawpah chuan goal chhuah loa draw result neih kha kan pawm mai a ṭul a ni. Chawlhlawk hman zawhah kan insiam rem a, hnehna chan ngei pawh tum mah ila a thleng ta lo thung. 

Hetiang ang game level sangah chuan chance vawi hnih lek neih pawh hi chakpui theih a ni. Mahse, chutianga chance kan chhawr lo a nih chuan United ang quality leh nawr let na tak tur ven chu kan tih tur a ni a, chu hna chu ṭha takin kan thawk a ni. Kan result hi kan pawm a, kan kal zel ang. 

Penalty bikah khan a tirah chuan ka hlauthawng deuh a, mahse, ka tidik lo tih ka hria. Ka ngaihdanah chuan kawr sen ha zawk khan a khawih fuh a, VAR kha eng atana rawn nge a nih ka hrethiam lo. 

Hudson-Odoi kha penalty chawi tur a ni a, thil lang chiang tak a ni. A kut dah dan kha en ula, ball a lo luha khatianga kut dah tur a nih chuan kei chu mitdel angah min ngai mai rawh u. 

Hnehna chan kan duh a, kan ball inpek fuh tawk lo mah se kan nawr na a, chak duhna thinlung nen kan thawkrim em em bawk. David de Gea khan save ṭha tak a nei a, kan clean sheet bawk. 

First half kha chu kan khel chhia a, game ropui lo tak a ni. Mahse, a chang chuan ṭha takin kan ti a, kan insiam rem ta maw tihah chance insiam mah ila kan la insiam hnem tawk lo.