Champions League khel tur Mumbai

Mumbai City chuan Pathianni zan khan Indian Super League inkhelah ATK Mohun Bagan chu 2-0 in an hneh a, season tharah AFC Champions League khel turin an tling. 

Tun season ISL-a league match hnuhnung berah hian Mumbai club tan Mourtada Fall leh Bartholomew Ogbeche-ten goal khat ve ve an khung a, Bagan lamin a chhanletna tur an neih loh avangin a tawpah 2-0 in an tlawm.

Mumbai-in hnehna an chan avangin Bagan nen an point hmuh zat a inang a, mahse head-to-head ah Mumbai club hi an san zawk avangin table chung bera awm chungin season an khar ta a ni. 

ISL-ah hian league round-a point hmu sang ber team chu League Winners Shield pek an ni ṭhin a, hei hian cheng nuai 50-a ken tel bakah Champions League khel turin an tling ṭhin. 

Asian Football Confederation hnuaiah Champions League khel turin league champion ngei nih a ngai a, ISL-ah knockout hmanga a sang paliin champion an zawn ṭhin avangin AFC-in ISL champion aiah league round-a champion hi an hnuaia inelna hmachhawn turin a pawm zawk a ni.

Mumbai coach Sergio Lobera hian season hmasa khan FC Goa chu Champions League khel tur hian a lo tlinpui tawh a, season zawh hma January-ah ban a ni thung - tun season-ah Mumbai City a enkawl a, Champions League khel turin a tlinpui leh ta.