Foxes ngam loh Arsenal

Arsenal chuan Leicester City lakah goal chhuah hmasa mah se huaisen takin an bei let a, goal thuma chhangletin Foxes mualah 3-1 in hnehna an chang. Point thum an hmuh hnuah Mikel Arteta chuan kawng dik an zawh thu a sawi.

Pathianni zan Premier League inkhelah Youri Tielemens-a'n minute rukna lekah goal hmahruai a khung a, mikhual lamin David Luiz hmanga an sut hnuah Alexandre Lacazette leh Nicolas Pepe ten an khung belh bawk.

King Power Stadium-ah Europa League khel chau pahnih an intawng a, European football aṭanga pet chhuah Leicester an chet chhiat chhumzawm laiin Arsenal erawhin rin hlawh lo zawk ni chungin hnehna an chang.

Gunners tlarhnung inrin kim hmain Tielemens goal kan hmu, season hmang ṭha zawk Foxes tan point thum a hnai. Mahse defender Luiz-a'n hla deuh tak aṭangin a tauh lut a, chawlhlawk hmain Lacazette-a'n an hmahruaina goal chu penalty aṭangin a khung.

Pierre-Emerick Aubameyang leh Bukayo Saka hahchawlhtir mah se an hmunruak luahtu Willian leh Pepe an khel ṭha a, Brazilian forward hian Luiz khung tur a siamsak a, pound maktaduai 72 man Pepe-a'n an goal thumna a khung bawk.

Arsenal manager Arteta chuan, "Team nghet tak din tum lai kan ni a, kan insiamrem mek zel. Kan nih tum ang tak la ni lo mah ila Leicester City laka kan khelh dan kha chu a lungawithlak hle. Tuna mi ang hian Benfica lakah pawh khan kan khel," a ti.

Brendan Rodgers enkawl Leicester hi chak lo mah se Premier League table-ah pathumna an la ni, khelh zat inangah palina West Ham aiin point liin an sang zawk - season thara Champions League khel turin an dinhmun a la ṭha tawk hle.

Foxes hian Nilaini zanah Burnley an lenchilh zui dawn. Arsenal erawhin Inrinni zanah Burnley tho hi an hmachhawn zui ve leh ang. Gunners hi table-ah 10-na an ni a, a sang pali zinga tel beiseina la bo lo mah se thil harsa a ni tawh ang.