Gareth Bale tak tak a inlar ta!

Footballer man to ber ni tawh, khawvel club lian leh hausa Real Madrid duhlai ni ṭhin kha a chawr chhuahna Tottenham Hotspur lamah a kir a, beisei a phak loh hnuah Gareth Bale chuan a nihna tak a pho chhuak leh ta.

Pathianni zan Premier League inkhelah Spurs hian an mikhual Burnley chu 4-0 in an sawp. North London club tan Bale-a'n goal hnih a khung bakah assist vawi khat a nei a, striker Harry Kane leh Lucas Moura ten goal khat ve ve an thawh ve bawk.

Tottenham Hotspur Stadium-ah goal khung turin Bale-a'n a nghah rei a ngai lo, minute hnihna lekah Son Heung-Min ball pek chu a tlawh goal. Real Madrid aṭanga an hawh lai hian hla taka awm Kane tana through ball pein English striker hian a hlah lo.

Spurs lamin an la duhtawk lo, Moura-a'n goal a neih bakah Bale bawkin Son hnen aṭanga a ball hmuh chu rang zeta insiamrem puiin goal kilah a thlawh lut a, anmahni mualah nuamsa takin Jose Mourinho naute an chak.

Kar hmasa lawk kha chuan, kum 31 mi Bale-a'n Real Madrid aṭanga Spurs a zawm hnua league match bika bul a ṭan zat chu vawi hnih chauh a ni. A agent Jonathan Barnett chuan a player hi a inkhelh hun a tawp hnai tawh nia a hriat thu a sawi hman hial.

Amaherawhchu, chutiang maiin Bale-a'n chawlh a la tum lo. Ni 11 chhung lekin match li a khel a, goal li a khung bakah a ṭhiante khung tur vawi thum zet a siamsak leh ta! A thi dawn emaw an tih 'Bale' kha a la nung reng e.

Tottenham manager Mourinho chuan, "Mi ṭhenkhat chuan thawnthu ziah an duh a, thudik leh dik tawk lo hmangin thawnthu an ziak ṭhin. Gareth Bale chungchangah pawh thuziak tam tak chhiar tur a awm.

"A nihna takah chuan Gareth Bale hi inkhel turin a inpeih a nih chuan manager tu pawhin an khelhtir em em ang. Goal hnih a khung kha a ni satliah lo, a chevel a hmuhnawmin a fit leh tawh tih a lang, a lo kir hnua a khelh ṭhat ber ṭum a tawng," tiin a forward a fak.

Real Madrid manager Zinedine Zidane-a'n a chhawr duh loh khan beiseina nen Tottenham a pan a, a tir lamah beisei phak loin London club-ah  a thamral zui mai dawn niin a lang hman. Tunah erawh khelmual chhungah ṭha takin a lo kir leh ta, a daih rei ang em tih chu hunin a la hril ang.