Roma hnehtu Milan beiseina a nung

AC Milan chuan kualmualah AS Roma 2-1 in an luhchhuah a, Italian Serie A champion nih an tumna an chhawm nung. Chak lo Roma erawh panganaah awmin an tan 'Scudetto' lak a harsa tawh ang.

Pathianni zan inkhel dangah Inter Milan chuan an mikhual Genoa 3-0 in an hneh a, point 56 hmuin hmahruaitu an ni chhunzawm. Antonio Conte naute hi Milan lakah point liin an sang fal mek a ni.

Serie A match an khelh hnuhnung pahnihah Milan an tlawm a, hmahruaitu an nihna pawh an hmelma Inter lakah an chan. Coach Stefano Pioli-a'n insiamṭhat an mamawh thu a sawi chu khelmual chhungah a takin an lantir.

Chawlhlawk hma deuha Milan midfielder Franck Kessie-a penalty khung chu Roma tan Jordan Veretout-a'n a sut, second half ṭan aṭanga minute ngana lekah yard 18 a hla aṭangin mawi takin a sut.

Hliam vangin Zlatan Ibrahimovic lak chhuah a ngai a, striker palian awm loh hnuah Milan tan goal khung belh a huphurhawm. Mahse, goal an chhuah aṭanga minute riat hnu lekah Ante Rebic chuan Alexis Saelemaekers hnen aṭanga a ball hmuh khungin an chak tlangpui.

Roma tan Manchester United leh Arsenal tana khel tawh midfielder Henrikh Mkhitaryan chuan goal khung mah se offside vanga pawm a ni lo, si phurh sut theihna remchang nei mah se goal ban hrulah a pet chhuak bawk.

Serie A season hmasa lama pahnihna Inter Milan chuan champion an tumruh hle. Manchester United player hlui pathum Romelu Lukaku, Matteo Darmian leh Alexis Sanchez te goal khat ṭheuh hmangin Genoa an hneh a, nomawi chawi leh chawi loh chu an kuta innghat a ni ta.

Inter tan hian ni dang ang bawkin Lukaku a hmuhnawm hle. Belgium international striker hian Serie A season kal laiah goal 18 a khung tling ta a, Genoa lakah goal a khung bakah hian Darmian khung tur a siamsak - a goal khung hi Lautaro Martínez thawhrah a seng a ni thung.

Conte chuan, "Kan khingpuite kha team ṭha tak an ni, an league match hnuhnung pasarihah tlawm an nei lo. Mahni inveng thiam leh thawhhona nei ṭha tak ni mah se kan vannei zawk a, hun pawimawh lai taka kan chet fuh zawk ṭhin kha kan chhawr.

"Ka naute hian nitin hma an sawn zel, nikum nena khaikhin chuan nasa takin kan puitling tawh a ni. Chutih rualin fimkhur a la ngai, dinhmun ṭha taka ding angin lang mah ila match 14 zet khelh tur kan la neih avangin engkim a la inthlak danglam thei," a ti.