Lille-in point an hloh

French Ligue 1 hmahruaitu Lille chuan point an hloh. Pathianni zan inkelah Lille hi an mikhual Strasbourg nen 1-1 in an inhnehtawk a, point hnih an hloh ṭhen avangin an hmahruaina chu a nghing.

Stade Pierre-Mauroy a inkhelah mikhual Strasbourg lamin Ludovic Ajorque a goal hmangin minute 36-naah hma an hruai a, season duhawm hmangtu Lille an tlawm mai dawn niin a lang hman.

Mahse, Lille an tlawm mai duh bik lo. Hun tawp hma minute li chauh a awm tawh tihin captain Jose Fonte chuan siphurh sutna goal a khung a, harsa takin point khat an hlawh chhuak hram.

League match 27 khelh chinah Lille hian point 59 hmuin hmahruaitu an la ni. Mahse champion lai PSG chuan na takin an um zel, an inkarah point hnih chauh a awm tawh - match khat chetsual hlekah an dinhmun a inthlak danglam thei der tawh tihna a ni.