Atletico Madrid an tho leh ta

La Liga match hnih ngawt an chak zawh tawh loh hnuah Atletico Madrid an tho ve leh ta a, Villarreal chu khualmualah 2-0 in an hneh. 

Atletico tan Alfonso Pedraza (own goal) leh Joao Felix-ten goal khat ve ve an khung a, Villarreal lamin a chhanletna tur an neih loh avangin Atletico an chak. 

Madrid khaw club hian hnehna an chan avangin league table chung berah an dinhmun an sawh ngheh chhunzawm zel a, anmahni hnaih bertu Barcelona aia match khata khel tlemin point ngain an sang. 

Nizan khan Real Madrid chuan Real Sociedad mikhualin he thu buatsaih a nih lai hian an result kan hre hman lo a, hnehna an chan chuan pahnihnaah invawrh chhoin point thum chauhin Atletico hi an hlat ang. 

Inkhel ṭan aṭanga minute 25-na lekah Atletico Madrid-in goal hmahruai an khung a, Thomas Lemar-a ball cross aṭanga lut a ni. 

Lemar hian goal-ah ball a thlawh lut a, he ball lo chang fuhtu Stefan Savic chuan ṭha zetin a tauh - hei hi Villarreal keeper Sergio minute 69-naah Joao Felix chuan lo dang mah se a hmaa ding Alfonso Pedraza a per a, a per lehlam hi a goal. 

Referee-in VAR hmangin goal hi a en zet a, a hnuah goal-ah pawm a ni. Atletico-in an duhtawk mai lo - an nawr chhunzawm reng a, minute 69-naah goal an hlawh chhuak leh ta nge nge. 

Joao Felix chuan box chhungah a awma ball la thlain a hlap nghal a, Asenjo tan dan chi a ni lo - kum 21 mi Felix-a'n tun season-ah match 29 khelin goal 10-a khung tawh a, assist vawi nga a nei bawk. 

La Liga 2013-14 season hnua champion beisei Atletico Madrid hian kar hmasa lawk khan rin loh takin result duhawm lo an nei a, hneh sa deuhthawa ngaih Levante chu khualmualah 1-1 a an inhnehtawkpui hnuin an mualah ngei 2-1 in an ngam lo zui. 

Champions League-in Atletico a nangching zui a, European club football inelna sang berah hian an mikhual Chelsea chu 1-0 in an ngam lo.

Atletico hi La Liga-a goal chhuah tlem ber niin league match 24-ah goal 16 chiah an chhuah - mahse, he team hian inelna hrang hranga an match hnuhnung pakuaah goal an chhuah vek a, Villarreal lakah an him ta. 

Chutihrual chuan Villarreal khelmualah 36% chiah ball an chang a, Yellow Submarine (Villarreal sawina) lamin vawi 19 zet shot an neih bawk avangin La Liga champion an tum a nih chuan an 'thawhlehna' hi a la famkim tawk lo. 

Atletico Madrid hi match hautakin a hmuak zui dawn - March 7 khian Madrid derby an khel dawn a, champion tura an elpui ber Real Madrid an mikhual ang. 

Los Rojiblancos (Atletico sawina) boss Diego Simeone chuan, "Phur takin, hmasawn duhin kan inbuatsaih dawn a ni. Kan elpui team ṭha tak kan hmachhawn dawn a, hei aia ṭha zawka khelh kan tum ang," a ti. 

Atletico hi Real nen an intawn hmasakah 2-0 in khualmualah an tlawm a, mahse, an insiamṭha chak hle - hemi hnuah hian league match khatah chiah an tlawm tawh. 

Real laka chak tur chuan Atletico hi Villarreal laka an khelh dan anga khelh a rem dawn lo a, Simeone-a sawi angin Villarreal laka an khelh dan aia ṭha zawka khelh a ṭul ang.