MSL an chhunzawm zawn Vawiinah semifinal thawhkhatna

Tualchhung basketball inelna lian leh ngaihhlut ber Mizoram Super League season 6 chu khelh zawm a ni dawn. Vawiin tlai dar 4:00 hian Khatla TBL leh Chanmari Vikings ten semifinal match hmasa ber an khel ang.

Zan dar 7:30-ah Zarkawt BCA leh Tuikual South an intawng zui dawn. Inelna hi Hawla Indoor Stadium, Republic Vengthlangah khelh tur a ni dawn, a hmunah entu an awm lo ang. Zonet Rihmin chuan live-in a pe chhuak dawn a ni.

MSL-ah hian Khatla TBL, Mission Veng Vikings leh Zarkawt BCA ten nomawi an chawi tawh. Kuminah hian Tuikual South chuan nomawi chawi an tum a, team thar Chanmari Vikings pawh title beisei ngam zingah an awm.

MSL6 hi nikum khan league round khelh a ni tawh, hrileng vangin khelh chhunzawm theih a ni lo. Kum khat deuh thaw a liam hnuah khelh chhunzawm leh a ni dawn chauh a, India ram pawn aṭanga player ṭha leh hmuhnawm tak tak chah luh kha hmuh tur an awm tawh dawn lo.

Semifinal khel hmasa ber tur Khatla TBL leh Chanmari Vikings te hi league round-ah pawh a intawng hmasa an ni a, TBL lamin 96-83 in hnehna an chang. Tun ṭumah erawh Vikings hian tlawm nawn an tum lo, thawnthu thlak danglam ngei an tum.

League round match an khelhah Zarkawt BCA an chak vek a, palina ni chunga semifinal khel tur Tuikual South tan tlang tur chuan vanneih tel a ngai dawn, chutihrualin league round an khelh ṭuma BCA chakna hi point hnih chauh a ni - Phengphehlep tan chak a beisei ngam ang.

MSL semifinal khelh hma hian chhun lamah relegation playoff khelh ṭhin a ni dawn, best of three hmanga chak zawk zawn tur a ni.

Chawnpui BC    01:30 PM    Ramhlun SC(R)

Khatla TBL    04:00 PM    Chanmari Vikings

Zarkawt BCA    07:30 PM    Tuikual South

Ramhlun SC    01:30 PM    Chawnpui BC (R)

Tuikual South    04:00 PM    Zarkawt BCA

Chanmari Vikings    07:30 PM    Khatla TBL

Chawnpui BC    01:30 PM    Ramhlun SC (R)

Khatla TBL    04:00 PM    Chanmari Vikings

Zarkawt BCA    07:30 PM    Tuikual South