Mizoramah Hockey India President

India ram chhunga Hockey thuneitu sang ber Hockey India president Gyanendro Nigombam chu Mizoramah a lo kal dawn. Ruahman dan chuan March 4, Ningani hian Aizawl a lo thleng ang.

Manipur mi Nigombam hi hmarchhak aṭanga Hockey India President ni thei hmasa ber a ni a, ram chung hotu lu ber zingah Mizoram rawn tlawh hmasa ber a ni ang.

Hockey India President hian tualchhung hockey player-te che tla a en dawn, state bakah district hrang hranga hockey hruaitute nen an inkawm dawn bakah Muallungthu rama hockey khelmual sakna tur a en nghal dawn.

Mizoram hian India tana khel phal hockey player a nei nual tawh. Tun dinhmunah Lalremsiami Hmar chu senior player pawimawh a ni mek a, junior lamah Lalrindiki Ralte (forward), Ramenmawii (goalkeeper) leh Marina Lalramnghaki (defence) te an awm mek.