Assam lakah Mizoram an tlawm

Vijay Hazare Trophy 2020–21 khelh laiah Mizoram chuan nimin khan an group match hnuhnung ber an khel a, ṭhenawm state Assam lakah run 182 in an chak lo - match li an khelh aṭangin chak nei loin inelna an hmang tluan.

IC-Gurunanak College Ground, Chennai a inelna neihah Mizoram hi ṭhum vawrah an vannei zawk, vawm hmasak an thlang. Assam tan Saahil Jain (86 runs), Denish Das (85) leh Pallavkumar Das (39) ten an thawh hlawk.

Assam lam hian over 50 aṭanga run 342 siamin mi pariat an in hloh a, an khingpui Mizoram tan target sang tawk tak an hnutchhiah. Cricket Assoaciation of Mizoram team tan chak tur chuan vanneih tel a ngai tih a chiang.

Mizoram vuak hun a thleng, ball 107 a hmachhawn aṭanga run 68 siamtu Taruwar Kohli bak che ṭha an awm lo. Tualchhung player zinga run siam hnem ber Moses Ramhlunmawia chuan run 13 a vaw chhuak a, over 43.5 chhunga run 160 siamin an thi vek.

Plate group-ah hian team pariat an awm a, match nga ṭheuh khel tura ruahman an ni. Nimin tlai khan match li an khelh tawh chinah Assam hian hnehna an chang vek a, tlang thei dinhmunah an ding. Mahse, Uttarakhand pawhin an match ngana an khel a, an chak a nih chuan Net Run Rate (NRR) nei ṭha zawk an tlang ang.