Goal thumin Aizawl FC a chhan zo lo

Pathianni zan I League inkhelah Aizawl FC-in Chennai City 3-0 in an sawp a, point thum hlu tak hlawh chhuak mah se Championship Stage thleng turin a tawk zo lo. Mizo club an vanduai a, an elpui pahnih Mohammedan SC leh Trau ten hnehna an chan avangin Chennai club an hmachhawn hma hian Championship Stage an thleng thei dawn tawh lo tih an hre tawh.

Aizawl FC hian Sudeva Delhi, Chennai City, Neroca leh Indian Arrows te hian Relegation Stage an khel dawn a, I League-a Mizo club an awm zel theih nan Yan Law-a hoten an theihna zawng zawng an chhuah chhunzawm a ṭul dawn a ni.

Trau leh Mohammedan te inkhel result-ah Aizawl FC an innghat a, Mizo club hian match hmasa berah RoundGlass Punjab an hneh loh avangin Punjab club erawh an umpha thei tawh lo.

Salt Lake Stadium-ah Mohammedan leh Real Kashmir an inkhel a, minute 34-naah Kolkata club defender Kingsley Obumneme hnawhchhuah a ni. Real Kashmir hi team ṭha zawkah an ngaih theih a, player pakhata an tam bawk avangin Mohammedan hi point chhuhsak ngei dawn niin a lang.

Amaherawhchu Mohammedan hian I League-a Chennai City champion pui tawhtu leh top scorer ni tawh Pedro Manzi an kawl a, Spanish forward hian minute 74-naah halfway thlen hma aṭangin goal-ah a pet a, keeper Mithun Samanta-a'n a dang thei lo.

Pedro Manzi goal mawi bik avangin Mohammedan dinhmun a ṭha a, Spanish forward hian minute 79-naah Mizo tlangval Vanlalbiaa Chhangte cross chu a tauh goal leh bawk. Hriangtlang tlangval Mabiaa a khel ṭha a, Real Kashmir tlarhnung tan a hnawksak hle.

Mohammedan an chak chiah hian Aizawl FC beiseina pakhat a bo a, Sudeva Delhi kutah an innghat zui. Kalyani Stadium-ah Sudeva Delhi an che ṭha zui a, William Pauliankhum hmangin minute 16-naah Trau lakah hma an hruai. Manipur club hian Bidyashagar Singh hmangin minute 35-naah siphurh sut mah se Shubho Paul hmangin minute 41-naah Sudeva

Delhi-in hma an hruai leh tho.

Mizo club-in beiseina sang tak nei mah se Sudeva aiin Trau-in chak an châk zawk. Minute 54-naah Konsam Phalguni Singh-a'n Trau siphurh sutna goal a khung a, minute 81-naah Joseph Olaleye-a'n Manipur club tan chakna goal a khung. Trau-in hnehna an chan chiah hian Mizo club tan Championship Stage khelh beiseina  tawp zui bawk.

Aizawl FC-in Championship Stage an thleng thei tawh lo tih hre chungin Kalyani Stadium-ah Chennai City an hmachhawn a, tha an thlah lo. Ṭum dang ang thoin an game a hmuhnawm a, ṭan phat aṭangin chak duhna thinlung an lantir nghal

Minute 7-naah Brandon VL Remdika ball pek chu Lalmuanzova'n goal-ah a chantir a, minute 10-naah Chennai City keeper Kabir Thaufiq hnawhchhuah a nih zui avangin Mizo club tan harsa tur a awm tawh lo. Midfielder ṭha mi R. Malsawmtluanga'n freekick aṭangin minute 37-naah goal mawi tak a khung a, second half-ah Lalremsanga Fanai-in a khung belh leh bawk.

Nimin tlai khan Churchill Brothers-in Gokulam Kerala 3-2 in an hneh a, Goan club hi phase 1-ah league hmahruaitu an ni. Nizan khan Neroca leh RoundGlass Punjab an inkhel a, result kan hre hman lo. 

Second phase-ah erawh point hmu sang parukin champion tur an zawng dawn a, Aizawl FC an tel ve ta lo. Mizo club hi chuan Sudeva Delhi, Chennai City, Neroca leh Indian Arrows te nen relegate tur an zawng dawn. Sudeva hi I League-a in lei tling thar an nih avangin kuminah an relegate thei lo a, Indian Arrows pawh rawlthar ṭha rual awm khawmna a nih avangin an tla thei lo bawk.

I League aṭanga tla tur chu Aizawl FC, Chennai City leh Neroca aṭanga point hmu hniam ber a ni dawn. An point hmuh hi chhiar chhunzawm tur a nih avangin Mizo club-in league match hnuhnung bera Chennai City 3-0 ngawt an hneh hi a pawimawh a, Mizo club hian Neroca hi 2-1 an hneh tawh bawk avangin relegate lo turin an dinhmun a ṭha hle.

Aizawl FC coach Yan Law chuan I League Championship Stage an thlen theih loh chhan chu an vanduai vang a nih thu Vanglaini a hrilh a, Covid-19 in harsatna a siam thu a sawi lang bawk.

Law chuan, "Hun pawimawha kan chesual ṭhin kha kan tuar ta a ni. Mohammedan leh Trau chak dan khan kan dinhmun a sawifiah a, kan vanduai a ni. Kolkata club leh Manipur club kha point hloh thei dinhmunah an ding ve ve a, mah se a tawpah an vannei," tiin Vanglaini a hrilh.

Aizawl FC coach Yan Law chuan sawi chhunzawmin, "Mizo player-te ka fak khawp mai. Richard Kassaga inhliam vangin kan chhawr thei lo a, Princewell-a'n harsatna a tawk bawk.

Foreigner kan nei mumal lo chungin I League team hmuhnawm ber zinga mi kan ni a, Mizo player-te ka fak hle. Aizawl FC hi enkawl hma ila chuan a danglam theih ka beisei a, chutihrualin Covid-19 vanga player thar lak a buaithlak avangin kan team-in harsatna kan tawk bawk," tiin a sawi.

Mizo club hian Indian Arrows lakah point hnih an hloh a, Arrows siphurh sutna hi injury time minute thumnaah a lut. Heng bakah hian Trau leh Sudeva Delhi an hmachhawn ṭumin penalty an hlah ve ve a, goal ve ve chu ni se result a danglam ve ve dawn. Yan Law-a'n an vanduai thu a sawi a, Aizawl FC inkhel en ṭhinten a thusawi an pawmpui ang.