Liverpool tan beiseina a vul leh ta

Premier League champion Liverpool-in nomawi humhim inbeisei tawh lo mah se Champions League khelh an tumna erawh a nung thar leh ta a, Pathianni zan khan khualmualah Sheffield United chu 2-0 in an hneh. 

Reds-in first half-a goal an khung loh hnuah Curtis Jones chuan Jurgen Klopp-a'n a rin chhan pholangin minute 48-naah goal hmahruai a khung a, a goal khung hi goalkeeper Alisson Becker-a pa tan a hlan zui. 

Brazilian keeper ṭha Alisson-a pa hi kar liam ta khan a thi a, Sheffield lakah pawh a pa sun hlim goalkeeper hi a inlan thei lo. Kum 20 mi Curtis chuan, "Ka goal khung hi Ally pa tan ka hlan a, hei hi ilo hmu a nih chuan i tan a ni e, ka unaupa," tiin inkhelh zawhah a sawi. 

Liverpool tan Roberto Firmino chuan minute 65-naah goal-a thawh ve leh bawk a, Brazilian striker hian mawi zeta Sheffield tlarhnung a pal darh hnuah a pet a, defender Kean Bryan chuan a lo dan per avangin 'own goal'-ah pawm a ni thung. 

Firmino goal hi Liverpool-in English top flight-a goal 7,000 an khungna chiah a ni a, English top flight-a hetiang zat goal khung thei dang hi Everton (7,108 goals) chiah an awm. 

Blades (Sheffield sawina) goalkeeper Aaron Ramsdale chet ṭhat zan ni lo se Liverpool hi goal tam zawk khung thei tur an ni. Mahse, kum 22 mi keeper hian first half-ah ringawt pawh vawi nga ngawt save ṭha zet zet a nei - Premier League first half-a save a ngah ber ṭum record a siam. 

Firmino chuan amah chauha Ramsdale a hmachhawn chungin a khung thei lo a, Mohamed Salah, Alexander-Arnold leh Georginio Wijnaldum-te shot chu English keeper hian a dang vek bawk. 

Sheffield hian chance nei lo erawh an ni bik lo - Alisson aia lut Adrian chuan David McGoldrick hun ṭha neih chu ṭha zetin a dansak a, Oliver McBurnie chuan vengtu nei lo chungin a tauh out bawk. 

Liverpool defender thar Ozan Kabak chuan first half-ah an lamah khung mah se McBurnie-a lo offside avangin a him hram a, kum 20 mi Kabak hi Nat Phillips nen tlarhnung laiah an inkawp - tun season Premier League-a Liverpool centre back inkawp 14-na an ni!

Reds manager Klopp chuan, "Mi tam takin min lo thai bo hman a, mahse ka hrethiam vek e. Harsatna heti zozai kan tawk chung hian dinhmun duhawm takah kan la awm mek a ni. 

"Zanin kan inkhel hi kan la tlawm lo tih pholanna a ni a, Ningani zana Chelsea kan hmachhawn hunah pholan leh a ṭul ang. Hnehna chan zel kan mamawh tih kan hria a, result ṭha neih loh chuan Champions League beisei theih a ni lo," a ti. 

Liverpool hi table-ah parukna an ni mek a, palina West Ham chu point hnih chiahin an phak lo. Sheffield erawh Newport County (fourth tier, 1970-71) hnua English football league-a an match hmasa 26-a vawi 21 tlawm thei hmasa ber an ni. 

Blades hian league table mawngphah an luah mek a, a him china awm Newcastle United an thlauhna chu point 15-a ni - match 12 chauh khelh tur awm tawha point 15-a table-a 17-na thlautu team hi Premier League chanchinah him an la awm ngai lo.